30 qazan men 8 qarasha aralyǵynda 34-shi Halyqaralyq Tokıo kınofestıvali ótedi
Kınofestıval sheńberinde belgili rejıser Dárejan Ómirbaevtyń «Aqyn» fılminiń álemdik deńgeıdegi tusaýkeseri ótedi, dep habarlaıdy Almaty-akshamy.kz QazAqparatqa silteme jasap.
QR Mádenıet jáne sport mınıstrligi tapsyrysy boıynsha «Ulttyq kınony qoldaý memlekettik ortalyǵy» qoldaýymen Sh.Aımanov atyndaǵy «Qazaqfılm» AQ túsirgen «Aqyn» fılmi Dıdar esimdi moıyndalmaǵan jazýshynyń ómiri týraly baıandaıdy.
Fılmniń senarıi nemis jazýshysy German Gesseniń «Avtorlyq kesh» jelisi boıynshy jazylǵan.
«Aqyn» fılmi eń aldymen otandyq kórermenderge arnalǵan. Osynyń aldynda túsirgen meniń basqa fılmderime qaraǵanda, bul týyndyny mazmuny men problematıkasy jaǵynan ulttyq kıno deýge bolady. Fılmde qazaq tili men ádebıetine qatysty problemalar kóterilgen. Alaıda bul kópshilikke ortaq másele, óıtkeni búginde qanshama tilder joıylyp barady, - dedi rejıser Dárejan Ómirbaev.
Aıta ketsek, 1980 jyldan beri ótkizilip kele jatqan Tokyo International Film Festival kınofestıvali - Halyqaralyq kınoprodúserler qaýymdastyǵy federasıasynyń (FIAPF) tirkeýinen ótken, «A» sanatyndaǵy álemdegi úzdik 15 kınobaıqaýdyń qataryna kiretin bedeldi festıválderdiń biri.
Bıyl festıválge qatysýǵa 113 elden 1533 ótinim kelip túsken eken. Nátıjesinde festıváldiń basty baıqaýyna 15 kınotýyndy iriktelip alynǵan, onyń 10 fılmi alǵash ret kórermenderge usynylatyn bolady.
Halyqaralyq qazylar alqasyn aty ańyzǵa aınalǵan fransýz aktrısasy Izabel Iýpper basqarady. Festıváldiń ashylý saltanatynda amerıkalyq rejıser Klınt Istvýdtyń «Jigitterdiń kóz jasy» atty kartınasy kórsetiletin bolady.