Ekologıasy nashar qalalar 2025 jylǵa deıin balamaly energıa kózderine kóshirilmek
Osy máselege qatysty QR Prezıdenti Qasym-Jomart Toqaev pikir bildirdi, dep habarlaıdy Almaty-akshamy.kz
Bul týraly ol «Parıj kelisiminiń maqsattaryna qol jetkizý joldary jáne Qazaqstannyń kómirtegi beıtaraptylyǵy» atty halyqaralyq konferensıada aıtty.
«2025 jylǵa qaraı neǵurlym lastanǵan 10 qala gazdandyrylyp, balamaly energıa kózderine aýystyrylatyn bolady. Qazaqstannyń jańartylatyn jáne balamaly energetıkany damytý úshin zor áleýeti bar. Bizdiń boljamdarymyzǵa sáıkes, 2030 jylǵa qaraı energıa teńgerimindegi JEK úlesi kem degende 15%-dy quraýy tıis», - dedi Qasym-Jomart Toqaev.
Sondaı-aq, Prezıdent osy baǵytta qabyldanyp jatqan sharalarǵa toqtaldy.
«Ol úshin biz normatıvtik ortany jetildiremiz, barynsha tartymdy jaǵdaılar jasaımyz. Bizdiń strategıalyq halyqaralyq áriptesterimizben birqatar jobalarǵa belgili bir úmit artamyz. Qazaqstan jasyl qarjylandyrýǵa kóp kóńil bóledi – Astana halyqaralyq qarjy ortalyǵynyń bazasynda «jasyl qarjy ortalyǵy» jumys isteıdi», - degen Memleket basshysy qazaqstandyq «Damý» ınstıtýty BUU Damý baǵdarlamasymen birlesip «jasyl oblıgasıalardy» bırjaǵa sátti shyǵarǵanyn eske saldy. «Bıyl Qazaqstan qor bırjasynda Qazaqstandaǵy balamaly energetıka nysandaryn qarjylandyrý úshin Azıa damý bankiniń jasyl oblıgasıalarynyń 2 ónimi shyǵaryldy», - dep túıindedi Prezıdent.