Fransıa aýrýhanalarynda dárigerler men medpersonal jetpeı jatyr
Fransıa aýrýhanalarynda jaǵdaı qıyn. "Deltadan" juqpalyraq dep tanylǵan "omıkron" shtamyn ekpe alǵan dárigerler de juqtyryp jatyr, sol sebepti olar jumystan úzilis alýǵa májbúr. Al ekpe saldyrmaǵan dárigerler jumystan shettetilýde, dep habarlaıdy Almaty-akshamy.kz QazAqparatqa silteme jasap.
Atalǵan ahýal saldarynan astanalyq óńirde qyzmetkerlerdiń jetispeýshiliginen jansaqtaý bólimderindegi tósek-oryn sany 20%-ǵa qysqardy. Sonymen qatar stasıonarlarǵa vırýs juqtyrǵandar kóp túsýde. Aýrýhana jetekshileri qyzmetkerlerge túsken salmaqqa alańdaýly. «Ázirge bizdiń brıgadalar shydamdylyq tanytýda, sebebi eshteńege qaramaı, aýrýhanaǵa jumysqa kelýge májbúr. Besinshi tolqynnyń erekshiligi – qazirgi kezde dárigerler ekpe alǵan jaǵdaıda aýrýhanaǵa túspeıtin naýqastar úshin kúresip jatyr», - dedi Delafontaine aýrýhanasy dırektorynyń orynbasary Ioan Mýre.
Keıbir aýrýhanalardaǵy naýqastar qorlardyń tapshylyǵynan jaqsy jabdyqtalǵan jáne vırýs juqtyrǵan naýqastary az basqa emdeý mekemelerine aýystyrylyp jatyr. Olardy tasymaldaý úshin sanıtarlyq avıasıa qoldanylýda. Mundaı jaǵdaı hali nashar eki naýqasty eldiń ońtústigindegi Antıbtan soltústiktegi Lıllge aýystyrý kezinde bolǵan.
«Munyń bári ońaı emes. Biz eki jyl buryn bolǵan ahýalǵa qaıta oralǵandaımyz. Hırýrgıalyq otalardy keıinge qaldyrdyq. Odan bólek, koronavırýstyń bul tolqynymen kúresý úshin eńbek demalysynan ýaqytynan erte shyqtyq», - deıdi medbıke.
Kóp aýrýhanalarda demalys kúnderi jumys isteý, jospardaǵy otalardy keıinge qaldyrý qalypty jaǵdaıǵa aınaldy. Medısınalyq qyzmetkerler men olardy usynatyn kásipodaqtar da prezıdenttik saılaýǵa qalǵan tórt aı ishinde bılik ornaǵan ahýaldy esepke alyp, tıisti sheshim qabyldaıdy dep úmittenedi.