Amanat partıasy tóraǵasynyń bastamasymen búkil respýblıka boıynsha Ekibastuz qalasynyń 1 myńnan astam balasyna demalys uıymdastyryldy. Onyń ishinde 30 bala partıanyń qalalyq fılıalynyń shaqyrýymen Almatyǵa keldi.
Almatynyń jas qonaqtary İle Alataýy taýlarynyń eteginde ornalasqan ári Almaty qalasynyń iskerlik ortalyǵyna jaqyn «Qazaqstan» shıpajaıynda ornalastyryldy.
Búgin ekibastuzdyq balalar úshin «Medeý» muzaıdynynda demalys uıymdastyryldy.
«Meniń esimim Tomırıs, Ekibastuz qalasynan keldim. Bul meniń Almatyǵa alǵashqy saıahatym. Kóńil-kúıimiz óte jaqsy. Sırkte tamasha qoıylym kórip, Medeýde syrǵanap kórdik. Demalys barysynda jańa dostar taptym. Ekibastuzdaǵy jaǵdaı endi elimizde qaıtalanbasyn dep tileımin», – dedi 8 synyp oqýshysy Tomırıs Baıkenova.
Oqýshylardy demalys barysynda baqylap júrgen ekibastuzdyq oqytýshylar da ózderiniń áserimen bólisti.
«Biz Ekibastuzdan 2 qańtar kúni jolǵa shyqtyq. Jolshybaı Astana qalasyna soǵyp, EKSPO-ǵa ekskýrsıa jasadyq. Almatyǵa barlyǵy 29 bala, 4 oqytýshy jáne 1 medbıke keldik. Jalpy, balalardy jaqsy qarsy aldy, barlyq kerek-jaraqpen qamtamasyz etip jatyr. Negizinen demalysqa az qamtylǵan ne tolyq emes otbasylardyń, kóp balaly januıalardyń balalary jáne oqýmen ne mektepten tys kezdegi jetistikterimen kózge túsken 5-11 synyp oqýshylary jiberildi», – dedi ekibastuzdyq oqytýshy Janerke Qabjanova.
Amanat partıasy tóraǵasynyń bastamasymen Ekibastuz qalasynyń balalary Qazaqstan óńirlerine demalysqa shaqyryldy. Onyń ishinde 30 balaǵa partıanyń Almaty qalalyq fılıaly demalys uıymdastyryp jatyr. Balalar «Qazaqstan» shıpajaıynda jaıly bólmelerge ornalastyryldy. Balalar úshin aýqymdy oıyn-saýyq baǵdarlamasy daıyndaldy. Sporttyq-saýyqtyrý kesheninde biregeı mıneraldy sýlardan turatyn baseın, sport zaly, eki emdik dene shynyqtyrý zaly, voleıbol, basketbol jáne fýtbolǵa arnalǵan oıyn zaldary bar», – dedi Amanat partıasy Medeý aýdandyq fılıalynyń atqarýshy hatshysy Azat Ajımanov.
Aıta ketken jón, balalar 9 qańtarda úılerine qaıtady dep josparlanǵan.
