Premer-Mınıstrdiń orynbasary Altaı Kólginovtiń tóraǵalyǵymen ótken keńeste densaýlyq saqtaý salasyn sıfrlandyrý máseleleri talqylandy.
Densaýlyq saqtaý salasyn sıfrlandyrý medısınalyq kómektiń qoljetimdiligin arttyrýǵa jáne dárigerlerdiń jumysyn jeńildetýge baǵyttalǵan. Osyǵan baılanysty elimizde sıfrlandyrýdy tereńdetý jáne densaýlyq saqtaý salasyndaǵy aqparat júıelerin biriktirý boıynsha júıeli jumys júrgizilip jatyr. Bul oraıda jeke medısınalyq derekterdiń taralý qaýpin joıý óte mańyzdy sanalady, dep habarlaıdy Almaty-akshamy.kz Primeminister.kz saıtyna silteme jasap.
Búgingi tańda pılottyq rejımde «eGov mobile» mobıldi qosymshasynda «eDensaulyq» jańa bólimi iske qosylyp jatyr, onda halyqtyń keńeıtilgen medısınalyq derekteri, onyń ishinde donorlyq mártebesi (tiri kezindegi), elektrondy reseptiler, medısınalyq qarsy kórsetilimder týraly málimetter, júktilik boıynsha esepke turý, dıspanserlik esepke turý, aýrýhanaǵa jatqyzý derekteri, vaksınalaý týraly aqparat, zerthanalyq zertteýler nátıjeleri týraly málimetter, kórsetilgen klınıkalyq-dıagnostıkalyq qyzmetter (dárigerdiń qabyldaýy jáne t.b.), aýrýhana paraqtary kiredi.
Aıta ketý kerek, qosymshanyń bir bóliminde atalǵan derekterdiń jınalýy medısınalyq kómek kórsetýdiń ashyqtyǵyn qamtamasyz etedi. El turǵyndary kez kelgen ýaqytta ózderiniń medısınalyq derekterine qatysty qajetti aqparatty ala alady.
«Medısınalyq kómekti odan da qoljetimdi etý, úıden shyqpaı alýǵa bolatyn qyzmetter tizimin ulǵaıtyp, olardyń sapasyn arttyrý úshin densaýlyq saqtaý salasyn sıfrlandyrý prosesterin jandandyrý jáne tereńdetý qajet», - dedi A. Kólginov.
Keńes qorytyndysy boıynsha jergilikti atqarýshy organdarǵa qupıa medısınalyq derekterdi qorǵaý kerektigin eskere otyryp, aqparat júıelerin biriktirý jáne sıfrlyq medısınany odan ári damytý jónindegi jumysty kúsheıtý tapsyryldy.