Bar máseleni jedel túrde sheshý qajettigi aıtyldy.
2022 jyly 17 naýryzda Qazaqstannyń Aýyl sharýashylyǵy mınıstri Erbol Qarashókeevtiń tóraǵalyǵymen kóktemgi dala jumystaryn júrgizý máseleleri jónindegi jedel shtabtyń kezekti otyrysy ótti, dep habarlaıdy Almaty-akshamy.kz.
«İs-sharaǵa shtab músheleri - vedomstvonyń qurylymdyq bólimsheleriniń basshylary, qalalar men oblystar ákimderiniń orynbasarlary, kvazımemlekettik sektor men azamattyq qoǵam ókilderi qatysty. Shtab músheleri kóktemgi dala jumystaryna daıyndyq barysyn, sondaı-aq áleýmettik mańyzy bar azyq-túlik taýarlarymen qamtamasyz etýdi qarastyrdy», - delingen ASHM baspasóz qyzmetiniń habarlamasynda.
Vedomstvo basshysy óz sózinde turaqtandyrý qorlaryna egin egýge daıyndyq jáne aýyl sharýashylyǵy ónimderin satyp alý máseleleri erekshe baqylaýda ekenin atap ótti.
«Prezıdent Qasym-Jomart Toqaev óziniń qazaqstandyqtarǵa Joldaýynda kóktemgi naýqandy sapaly ótkizý Úkimet pen ákimdikterdiń basymdyǵy bolyp tabylatynyn atap ótti, agrarshylardyń barlyq qajettilikterin tolyq qamtamasyz etý qajet», - dedi Erbol Qarashókeev.
Aýyl sharýashylyǵynyń birinshi vıse-mınıstri Aıdarbek Saparov óńirlerdiń kóktemgi dala jumystaryn júrgizýge daıyndyǵy týraly aqparatpen tanystyrdy.
Onyń aıtýynsha, 2022 jylǵa egis alqaptarynyń qurylymy qalyptasqan, jalpy egis alańy 23,1 mln ga quraıdy, bul ótken jyldyń kórsetkishinen 125 myń ga artyq. Aýyl sharýashylyǵy tehnıkasy 95% jumysqa daıyn. 400 myń tonna kóleminde dızel otyny bólindi, bul ótken jylmen salystyrǵanda 20 myń tonnaǵa artyq, tuqym sebý jospardan 100% júzege asyryldy.
Aǵymdaǵy jyly shamamen 659 myń tonnany engizý josparlanǵan, bul ótken jylmen salystyrǵanda 32,2 myń tonnaǵa artyq.
Egis naýqanyn qarjylandyrýdy arttyrý máselesi oń sheshimin tapty, «Keńdala» baǵdarlamasy boıynsha 70 mlrd teńge jáne azyq-túlik korporasıasy arqyly 80 mlrd teńge «Agrarlyq nesıe korporasıasy» arqyly taǵy 70 mlrd teńge bólinedi.
Óz kezeginde shtab músheleri - qalalar men oblystar ákimderiniń orynbasarlary tehnıkanyń daıyndyǵy, qosalqy bólshekterdiń, dızel otynynyń bolýy, tuqym sebý, ósimdikterdi qorǵaý, tyńaıtqyshtardyń bolýy jáne fermerlerdiń kóktemgi naýqanǵa daıyndyǵynyń basqa da máseleleri týraly habardar etti.
«Aýyl sharýashylyǵy qurylymdarymen turaqty jumys júrgizý, problemalyq máselelerdi der kezinde anyqtaý jáne olarǵa den qoıý qajet. Kóktemgi dala jumystaryn qarjylandyrý jáne tehnıkany lızıńke berý máselelerin jedel sheshý. Qazirgi jaǵdaıda shekten tys búrokratıa men áýre-sarsańǵa salýǵa jol berilmeıdi», - dep atap ótti Erbol Qarashókeev.
Sonymen qatar, Memleket basshysynyń tapsyrmasyna sáıkes, ákimdikter turaqtandyrý qorlaryn qalyptastyrý jáne otandyq aýyl sharýashylyǵy taýaryn óndirýshiler men qaıta óńdeý kásiporyndaryn forvardtyq qarjylandyrýǵa «aınalym sqemasyn» qalyptastyrý sheńberinde kózdelgen aqsha qarajatynyń bir bóligin baǵyttaý boıynsha jumysty jandandyrýy qajet.
Bul shara otandyq óndirýshilerdi qoldaýǵa, ásirese, SHQB kezinde, sondaı-aq aýyl sharýashylyǵy taýaryn óndirýshilerge ótkizý naryqtaryna qol jetkizýge, ónimdi satyp alý jáne ótkizý júıesin retteýge múmkindik beredi.
Sondaı-aq, mınıstr Memleket basshysynyń tapsyrmasy boıynsha salany memlekettik qoldaý júıesin túzetý jumystary júrgizilip jatqanyn aıtty.
Buǵan qosa, aǵymdaǵy ahýaldy jáne onyń damý úrdisterin keshendi taldaýdy negizge ala otyryp, sýbsıdıalaýdyń jańa tetigin engizý máselesin kelesi jylǵa deıin keıinge qaldyrý jáne aǵymdaǵy jyly AÓK-ni qoldanystaǵy qaǵıdalar boıynsha memlekettik qoldaýdy júzege asyrý týraly sheshim qabyldandy.
«Sonymen qatar, otandyq agroónerkásiptik keshenniń turaqtylyǵyn saqtaý qajettiligin eskere otyryp, memlekettik qoldaýdy saqtap qana qoımaı, kúsheıtý týraly sheshim qabyldandy», - dedi Erbol Qarashókeev.
Sýbsıdıalaýdyń jańa erejelerin ázirleý prosesi jalǵasyp jatyr, aldaǵy úsh jyldyq búdjettiń parametrlerin josparlaý kezinde negizge alynatyn tujyrymdamalyq sátter ázirlenedi jáne kelisiledi.
Sóz sońynda Erbol Qarashókeev jalpy daıyndyq bar ekenin, alaıda ákimdikter derekterdi qaıta tekserip, problemalyq máselelerdi anyqtaǵan kezde, olardy jedel túrde sheshý qajettigin atap ótti.