Estonıanyń astanasy Tallın qalasynda ótken halyqaralyq týrnırde almatylyqtar kúmis júldeger atandy
Almaty estetıkalyq gımnastıka mektebiniń «Sunrise» komandasy Estonıanyń astanasy Tallın qalasynda ótken halyqaralyq týrnırde kúmis júldeger atandy. Jasóspirimder (14–16 jas) sanatynda synǵa túsken qyzdarymyz 10 komanda arasynda namysty qoldan bermeı, el mereıin ústem etti. Olar Fınlándıadan kelgen álem chempıondarynan keıin ekinshi orynǵa jaıǵasty. Osyǵan oraı biz gımnastıka mektebiniń dırektory ári «Sunrise» komandasynyń jattyqtyrýshysy Jannet Jaboevamen áńgimelesken edik.
– Tallınde ótken jarysta el namysyn qorǵaǵan qyzdar týraly aıtyp berseńiz.
– Bizdiń gımnast qyzdardyń barlyǵy Almatydan. Olar: Ámına Beıǵanova (komanda kapıtany), Tomırıs Bolat, Altynaı Nurkenqyzy, Ánel Nursultan, Aılın Maqsutova, Amılá Qunanbaeva jáne Ádelıa Tursynqoja. Barlyq qatysýshylar – bizdiń estetıkalyq gımnastıka mektebiniń oqýshylary. Óner ordamyzda barlyǵy 200-ge jýyq qyz bar. Olarmen 10 jattyqtyrýshy jumys isteıdi. Atalmysh jarysqa komandany Madına Mýtalıeva ekeýmiz daıyndadyq.
– Estetıkalyq gımnastıka – Qazaqstanda endi damyp kele jatqan jańa sport túri. Osy sala týraly pikirińizben bólisseńiz.
– Bul sport túrinde kórkem gımnastıka elementteri bar. Tek estetıkalyq gımnastıka – ujymdyq sport. Mysalǵa, sınhrondy júzýmen salystyra alamyz. Barlyq gımnastıkalyq qozǵalystar dınamıkalyq turǵydan, jyldamdyq jaǵynan birdeı ózgerip, birkelki oryndalýy kerek. Kompozısıada tolqyn jáne terbelý qozǵalystary, gımnastıkalyq sekirýler, spıráldy burylystar jáne kórkem bı sıaqty jan-jaqty dene qozǵalystary bolýy kerek.
Sportshylar qozǵalys sheberligimen birge symbattylyq pen úılesimdilikti qatar kórsetedi. Tek bir kemshiligi – bizdiń sport Olımpıada baǵdarlamasyna enbegen. Sol sebepti, estetıkalyq gımnastıka memleket tarapynan qarjylandyrylmaıdy. Ázirshe, sportshylarymyz barlyq jarystarǵa óz qarajatyna barýda.
Suhbattasqan Dosbol ATAJAN.