Qazaqstan Premer-Mınıstri Oljas Bektenov Eýrazıalyq damý bankiniń basqarma tóraǵasy Nıkolaı Podgýzovpen kezdesý ótkizdi. Investısıalyq ózara is-qımyldy keńeıtý jáne EADB-nyń ınfraqurylymdyq jobalardy iske asyrýǵa qatysýy máseleleri qaraldy.
Oljas Bektenov pen Nıkolaı Podgýzov Eýrazıalyq damý bankiniń Qazaqstandaǵy joǵary ınvestısıalyq belsendiligin atap ótti. Jyl basynan beri EADB $900 mln-nan asatyn somaǵa ekonomıkanyń túrli sektorlaryndaǵy jobalardy qarjylandyrdy. Sonymen qatar 2023 jyly Qazaqstanǵa $1 mlrd qarajat salyndy. Osy jyldyń qorytyndysy boıynsha ınvestısıa kólemi edáýir artyp, $1,4-$1,6 mlrd-qa jetedi dep kútilýde.
Qazaqstanda iske asyrylyp jatqan EADB negizgi jobalarynyń tizbesinde – kómir óndirýdiń sıkldik-aǵyndyq tehnologıasyn engizý, kún elektr stansalaryn salý, «Astrahan – Mańǵyshlaq» magıstraldy sý qubyryn rekonstrýksıalaý jáne keńeıtý, avtojoldardy salý jáne rekonstrýksıalaý jobalary bar.
Oljas Bektenov Eýrazıalyq damý banki mańyzdy seriktesterdiń jáne ınvestısıalardyń senimdi kózderiniń biri bolyp sanalatynyn atap ótti.
«Memleket basshysy Qazaqstan halqyna Joldaýynda birinshi kezektegi ınfraqurylymdyq máselelerdi sheshý mindetterin atap ótti. Qazir Úkimet ınjenerlik, kólik, áleýmettik jáne sıfrlyq ınfraqurylymdy jańǵyrtý jáne salý boıynsha aýqymdy jumys júrgizip jatyr. Biz Bankpen ózara tıimdi sharttarmen yntymaqtastyqty keńeıtýge daıynbyz jáne el ekonomıkasy úshin mańyzdy jobalardy birlesip iske asyrýǵa múddelimiz», — dep atap ótti Oljas Bektenov.
Óz kezeginde EADB Tóraǵasy Nıkolaı Podgýzov Banktiń iri ınvestısıalyq jobalardy júzege asyrýdaǵy ózara is-qımyldy nyǵaıtýǵa daıyn ekenin málimdedi.
Sondaı-aq taraptar Banktiń aǵymdaǵy ınvestısıalyq portfeli, kapıtal qurylymyn ártaraptandyrý, korporatıvtik basqarý sapasyn arttyrý máselelerin talqylady.
Anyqtama:
Eýrazıalyq damý banki – 2006 jyly qurylǵan halyqaralyq qarjy uıymy. Banktiń jarǵylyq kapıtaly $7 mlrd quraıdy. Aǵymdaǵy ınvestısıalyq portfeldiń salalyq qurylymy: energetıka – 21,7%, kólik – 18,1%, taý-ken ónerkásibi – 27,5%, qarjy sektory – 9,2%, ınfraqurylym – 5,8%, mashına jasaý – 2,8%, agroónerkásip kesheni – 3,3%, hımıa ónerkásibi – 7,3%, qurylys – 1,1%% , basqa salalar – 3,2%-dy quraıdy.