Búgin Almatynyń Ortalyq stadıonynda jyldyń eń aýqymdy mýzykalyq oqıǵalardyń biri Djennıfer Lopestiń Up All Night atty álemdik týry aıasyndaǵy jeke konserti ótip jatyr. Ánshi bul saparmen alǵash ret Qazaqstanǵa at basyn tirep, áýeli Astanada óner kórsetti, al endi tyńdarmandardyń suranysymen Almaty tórine kelip, qalany jahandyq mýzyka áleminiń jarqyraǵan ortalyǵyna aınaldyrdy, dep habarlaıdy Aqshamnews.kz.
Sahnaǵa álemdik juldyzdy kórýge 20 myńnan astam kórermen jınaldy. Olardyń arasynda 35-ten astam elden kelgen meımandar men 8 myńnan asa sheteldik týrıs bar. Keshtiń sáni kirip, sahnadan kúmbirlegen hıt áýender tógildi; kórermender bılep, birge shyrqap, este qalar sátti telefonǵa túsirip álek.
Tańnan beri stadıon aýmaǵy merekelik kóńil-kúıge bólendi. Almaty turǵyndary men qonaqtaryn arly-berli ótken kóshe ártisteri men kóńildi maskottar qarsy alyp, merekeniń alǵashqy shýaǵyn shashty. Qala qyzmetkerleri men eriktiler tártip pen tazalyqty qatań qadaǵalap, qoqys jınalýyna jol bermedi. Sol sebepti bul keshte tek sahna shamdary ǵana emes, shahardyń ózi de jarqyrap turdy.
Kórermenderdi konsertke kirgizý saǵat 15:00-de bastaldy. Arenaǵa úsh kireberis arqyly — Abaı dańǵyly, Sátbaev jáne Baıtursynov kósheleri jaǵynan kirýge múmkindik berildi. Ásirese, Sátbaev kóshesi jaǵynda adam nópiri kóbeıgen sátte kishigirim toptasý baıqaldy.
Uıymdastyrýshylar, jeke kúzet, eriktiler men polısıa qyzmetkerleri kórermen aǵynyn rettep, tártip pen qaýipsizdikti qamtamasyz etti. Barlyq qonaq óz ornyna der kezinde jaıǵasyp, konsert ýaqytyly bastaldy.
Barlyq qyzmettń úılesimdi jumysy, árbir usaq-túıekke mán berýi jáne uıymdastyrýshylar men qalalyq qyzmetterdiń birlesken eńbegi konserttiń minsiz ótýin qamtamasyz etti. Bul kesh kórermenderge mýzykalyq áser ǵana emes, Almatyda ótken mádenı is-sharanyń joǵary deńgeıde uıymdastyrylǵany týraly jyly estelik qaldyrdy.