Búgin Almaty jyldardyń eń kóp kútken mýzykalyq oqıǵalarynyń biri – Djennıfer Lopestiń Up All Night atty álemdik týry aıasyndaǵy jeke konserti úshin myńdaǵan shaqyrym jol júrip kelgen qonaqtardy qarsy alyp otyr. Kópshiligi úshin bul – Qazaqstanǵa alǵash kelýi, al osynda kelgen soń olar tek kópten kútken shoýdy emes, ǵashyq bolmaı ketpeıtin qalany da atap ótti.
Sheteldik jáne ózge qalalardan kelgen kórermender Almatyǵa tánti bolǵanyn aıtady. Keremet tabıǵat kórinisteri men taý, qonaqjaı ári meıirimdi adamdar, baı asqanasy, taza aýa jáne qalanyń erekshe atmosferasy – olar úshin naǵyz jańalyq boldy.
«Biz arnaıy Djennıfer Lopestiń konserti úshin Almatyǵa ushyp keldik. Onyń shyǵarmashylyǵyn qatty jaqsy kóremiz jáne ony kórýdi uzaq armandadyq. Bul kesh bizge teńdessiz emosıalar syılaıdy dep úmittenemiz», - Novokýznesk (Reseı) qalasynan kelgen Artóm Chıjık.
Qytaıda turatyn Krıstına Sagaıdak pen Anastasıa Týrdyakyn da oıyn bólisti.
«Men Taılandta demalyp jatqanda, tikeleı sol jerden Almatyǵa Djennıfer Lopestiń konsertine bılet satyp aldym. Mundaı múmkindikti jiberýge bolmaıdy dep sheshtim», — deıdi Krıstına.
«Biz ápkem ekeýmiz bıletterdi kóktemde-aq VPN arqyly aldyq. Buǵan deıin Sıngapýr men Gonkongta álemdik juldyzdardyń konsertterinde boldyq jáne Almatyda da sondaı jarqyn bolady dep úmittenemiz. Uıymdastyrý da joǵary deńgeıde bolsa deımiz», — dep tolyqtyrdy Anastasıa.
«Men bul qalaǵa alǵash ret kelip otyrmyn jáne shyn máninde, tek konsertke kelgenmin. Biraq taǵy kelgim keletinin túsinip otyrmyn. Munda tabıǵattan bastap, sáýlet, adamdar men taǵamǵa deıin bári ǵajap», — deıdi taǵy bir kórermen.
Búgingi kesh olar úshin álemdik sýperjuldyzben kezdesý ǵana emes, sonymen qatar Almatyny jańa qyrynan ashýǵa múmkindik bolmaq.