Ortalyq stadıon Djeı Lo konserti úshin bos bolmaýy múmkin.
Bul týraly almatylyq «Qaırat» fýtbol klýby málimdedi, dep habarlaıdy aqshamnews.kz.
Keshe prodúser Málik Hasenov Djennıfer Lopes 10 tamyz kúni Almatynyń Ortalyq stadıonynda jeke konsertin ótkizetinin aıtty.
Bul aqparatqa baılanysty «Qaırat» fýtbol klýby málimdeme jasady.
Klýb málimetinshe, respýblıkalyq jarys kúntizbesine engen «Qaırat» pen «Jeńis» resmı machy 9 nemese 10 tamyzda Ortalyq stadıonda ótedi dep josparlanǵan. Sonymen qatar 7 jáne 12 tamyzda komanda eýrokýbokqa qatysady. Osyǵan baılanysty stadıon ÝEFA talaptaryna sáıkes mindetti túrde daıyndalady jáne bul kúnderi basqa sharalardy ótkizýge bolmaıdy.
— 2025 jylǵy 16 mamyrda «Qaırat» FK Almaty qalasynyń Sporttyq nysandar dıreksıasynan Ortalyq stadıondy mádenı sharaǵa aldyn ala brondaý týraly resmı habarlama aldy. Jaýap retinde resmı hatta klýb QR Chempıonaty Premer-lıgasynyń bekitilgen sporttyq kúntizbesine, sondaı-aq «Qaırat» fýtbol klýbynyń eýrokýbok aıasyndaǵy halyqaralyq mindettemelerine baılanysty kórsetilgen merzimde stadıondy paıdalanýǵa bolmaıtynyn habarlady, — delingen klýb málimdemesinde.
Sonymen «Qaırat» fýtbol klýby mádenı bastamalardy qurmetteıtinin ári dıalogqa ashyq ekenin habarlady.
— Biz Ortalyq stadıondy paıdalaný kestesin ázirleýde barlyq múddeli taraptyń odan ári syndarly ózara áreketin kútemiz, — deıdi «Qaırat» FK.
Eske sala keteıik, buǵan deıin sheteldik juldyzdyń Almatyǵa keletinin habarlaǵan bolatynbyz.