Ánshi álemdik úılesimdilik ıdeıasyna negizdelgen sıngldi usyndy.
Dımash Álemdik jáne dástúrli dinder lıderleriniń VII sezi aıasynda óner kórsetti, dep habarlaıdy Almaty-akshamy.kz Baq.kz silteme jasap.
VII sıez delegattary men qatysýshylaryna arnap uıymdastyrylǵan «Sanalýandyq birlik» atty konserttik baǵdarlama birqatar belgili ári talantty ónerpazdardy bir alańda jınady.
13 qyrkúıekte «Astana Opera» teatrynda ótken arnaıy sharada álemge áıgili qazaqstandyq ánshi Dımash Qudaıbergen jańa shyǵarmasyn oryndady.
Kesh barysynda álem juldyzy Dımash Qudaıbergen kórermenderge tujyrymdamasy adamzat qoǵamyndaǵy ózara syılastyq pen kelisim prınsıpteri saqtalǵan jaǵdaıda ǵana qol jetkizýge bolatyn álemdik úılesimdilik ıdeıasyna negizdelgen sıngldi usyndy. Sondaı-aq, ánge dinı jáne rýhanı qundylyqtar adamdar arasyndaǵy jalpyǵa ortaq beıbitshilik pen kelisimge jetýdiń eń mańyzdy baǵdary ekeni arqaý bolǵan.
Dımash bul shyǵarmany jazýdy 3 jyl buryn bastaǵan bolatyn. Ulym kompozısıaǵa barynsha jaýapkershilikpen qarady, bar yntasyn saldy. Jańa týyndynyń mýzykasynyń avtory da ózi. Alǵashynda izgilik pen tatýlyqty tyńdarman boıyna sińiretin jyr jazý, halyq birligin kórsetý kerek degen oı ǵana boldy, – dep atap ótti mýzykanttyń ákesi Qanat Aıtbaev jańa án týraly.
Konsert baǵdarlamasy aıasynda sıez qatysýshylaryna arnap Qazaqstannyń eńbek sińirgen qaıratkerleri Azamat Jyltyrkózov, Bıbigúl Januzaq, Nurbolat Arzamas, Jámılá Jarqymbaeva, halyqaralyq baıqaýlardyń laýreaty Jaqsykeldi Maıasarov, P.I.Chaıkovskıı halyqaralyq baıqaýynyń laýreaty Aqbıke Alǵı sekildi ártister óner kórsetti. Sondaı-aq sharaǵa «Astana Opera» teatrynyń hory, balet trýppasy men sımfonıalyq orkestri, dombyrashylar ansambli, Memlekettik respýblıkalyq akademıalyq koreı teatrynyń bı toby, «Astana Opera» balalar hory, «Astana balet» teatry, «Astana sazy» ansambli jáne basqa da birqatar bı ujymdary qatysty.
Sez baǵdarlamasynda mádenı sharalardyń tutas toptamasy erekshe oryn alýy kezdeısoqtyq emes. Mádenıet pen óner – qoǵamnyń rýhanı damýynyń ajyramas serigi, tipti sharty. Al búginde búkil álem ıdeologıalyq-qundylyq daǵdarysyn bastan ótkerip, qoǵam úshin asa mańyzdy moraldyq nusqaýlardy izdep jatqanda bul jaıttyń mańyzy zor, – dedi VII sıeziń resmı ókili Nazym Janǵazınova.
Aıta ketý kerek, Qazaqstanda «Sanalýandyq birlik» atty biriktirýshi qaǵıdatqa negizdelgen konfesıaaralyq kelisimniń biregeı modeli qalyptasqan. Ol beıbitshilik ıdeıalaryn jáne rýhanı qundylyqtardy ilgeriletýge baǵyttalǵan dinniń barlyq túrlerine tózimdilikpen qaraýǵa negizdelgen.
Óz kezeginde, Álemdik jáne dástúrli dinder lıderleri seziniń eń mańyzdy mindetteri - dinaralyq jáne konfesıaaralyq dıalog dástúrlerin nyǵaıtý, dinı birlestikter arasyndaǵy ózara túsinistikti tereńdetý, zamanaýı qoǵamda toleranttylyq pen ózara qurmet mádenıetin damytý.
VII sıeziń negizgi kún tártibinde adamzattyń pandemıadan keıingi kezeńdegi áleýmettik-rýhanı damý joldaryn talqylaý bolady dep kútilýde.
VII sıez jumysyna álemniń 50 elinen 100-den astam delegasıa qatysady. Delegattar arasynda Rım Papasy Fransısk, ál-Azhardyń joǵarǵy ımamy sheıh Ahmad at-Taıeb, Izraıldiń bas ashkenazı ravvıni Davıd Laý, Izraıldiń bas sefard ravvıni Ishak Iosıf jáne basqa da dinı jetekshiler bar.
