Jańa Qazaqstan úshin el birligi men memleketshildik – mańyzdy irgetas.
Naýryz aıyndaǵy Joldaýynda Prezıdent memlekettik múdde jolynda etnostardyń uıysýyn «aýqymdy ózgeristerdiń júrýin tezdetetin» faktor retinde baıyptady, dedi Qazaqstan halqy Assambleıasynyń «El birligi – jańarǵan Qazaqstannyń tiregi» atty HHHİ sesıasynda Eýrazıa ulttyq ýnıversıtetiniń prorektory, ǵalym Dıhan Qamzabekuly, dep habarlaıdy Almaty-akshamy.kz.
Ǵalymnyń pikirinshe, Jańa Qazaqstan úshin el birligi men memleketshildik – mańyzdy irgetas. Jańa Qazaqstannyń máni aıqyndaldy: ol, birinshiden, eldik qaýipsizdikti qanaǵattandyratyn, ekinshiden, azamattardyń áleýmettik bastamalaryn qoldaıtyn keshendi rekonstrýksıa, qaıta qurylymdaý.
Halqymyzdyń «Jaýdy jeńgen – jarty batyr, ózin jeńgen – shyn batyr» degen myń jyldyq ata sózi bar. Bul «eliń úshin, óziń úshin, urpaǵyń úshin túzel, áreket et» degendi bildiredi.
Qazaq eliniń dástúrli bereke-yntymaǵy men taǵdyr qosqan etnos ókilderiniń parasaty maqtanysh tutarlyq, biraq qazirgi syn-qaterler bul bereke men parasatty tolyqtyrýdy, baısaldy, baıandy etýdi talap etedi. Osy rette Memleket basshysy usynǵan Ulttyq quryltaıda tarıhı tájirıbe men qazirgi syndarly izdenisterdiń saraptalýyna senim bildirdi ǵalym.
«Bir ustanymymyz: san ǵasyrlyq memleketshildik arqaýymyz, ekinshi ustanymymyz: árqashan eldi uıystyrýǵa sebepshi til men dástúrdiń altyn qazyǵy – qazaq ultynyń danalyǵy desek, bul tezıs te álemdik úılesimdilikke sáıkes keledi», – dedi Dıhan Qamzabekuly.