2023 jyldan beri bul másele ýshyǵa túsken.
Dúnıejúzilik densaýlyq saqtaý uıymynyń sarapshysy álemde tyrysqaq aýrýynyń kóbeıýine baılanysty buǵan nazar aýdarýǵa shaqyryp otyr, dep habarlaıdy Almaty-akshamy.kz
5 900 adam qaıtys bolǵan!
Dúnıejúzilik densaýlyq saqtaý uıymynyń tyrysqaq jáne epıdemıalyq dıareıalyq aýrýlar tobynyń jetekshisi Fılıpp Barboza «álem boıynsha tyrysqaq indetiniń kúsheıýine» nazar aýdardy. Ol klımattyń ózgerýi saldary men der kezinde emdelýge qarjy jetispeýinen jaǵdaı qıyndap otyrǵanyn atap ótti. Byltyr qańtarda DDSU bul aýrýdyń órshýin úshinshi deńgeıdegi tótenshe jaǵdaı, ıaǵnı eń joǵary deńgeı dep baǵalaǵan edi.
Barbozanyń aıtýynsha, sodan beri jaǵdaı tek nasharlap jatyr. Keıingi málimetterge sáıkes, 2023 jyldyń basynan 2024 jyldyń 31 naýryzyna deıin 31 elde tyrysqaq aýrýyn juqtyrǵan 824 479 adam tirkelip, 5 900 adam qaıtys bolǵan.
Ózdiginen emdelýge bolmaıdy!
Eske salsaq, Densaýlyq saqtaý mınıstrliginiń baspasóz qyzmeti azamattarǵa tyrysqaq aýrýyna baılanysty eskertý jasaǵan bolatyn. DSM qazaqstandyq týrıserge tyrysqaq aýrýy boıynsha qolaısyz elderge (Afrıka, Azıa, onyń ishinde Úndistan, Aýǵanstan, Pákistan elderi) barý kezinde mynadaı keńes bergen:
qaınatylǵan nemese bótelkedegi sýdy ishý;
ár túrli sýsyndardy salqyndatý úshin muzdy paıdalanbaý;
ónimderdi tutyný aldynda tıisti termıalyq óńdeý;
jemister men kókónisterdi qaınatylǵan nemese bótelkedegi sýmen muqıat jýý;
tamaq isher aldynda jáne dárethanaǵa barǵannan keıin qoldy sabynmen muqıat jýý;
tek ruqsat etilgen sý aıdyndarynda shomylý jáne onyń sýyn jutpaý;
aýrýdyń alǵashqy belgileri paıda bolǵan kezde ózdiginen emdelýge bolmaıdy, dereý medısınalyq kómekke júginý kerek.