Tokıo olımpıadasynda sadaq tartýdan erler arasyndaǵy jeke synda Ilfat Abdýlın sheshýshi kezeńge deıin jetip, jańa beles belgiledi. Endigi jerde qazaqtyń tabıǵatyna tán ónerde úlken serpilis bolady dep senemiz. Sonyń alǵashqy nátıjesi de kórine bastaǵan sıaqty.
Sadaq tartýdan Vroslavta (Polsha) ótken jasóspirimder arasyndaǵy álem chempıonatynda qazaqstandyq sadaqshy Dáýletkeldi Jańbyrbaı uldar arasynda jekeleı synda IV oryn aldy. Bul týraly Olympic.kz portaly habarlaıdy.
D.Jańbyrbaı álem chempıonatynyń jartylaı fınalyna deıin jetti. Ol fınal joldamasy úshin norvegıalyq Lúdvıg Henrıksenmen kezdesip, 2:6 esebimen jol berdi. Al jarystyń kishi fınalynda úndistandyq Bıshal Changmaıǵa jol berip, álem birinshiligin úzdik tórttikte aıaqtady.