Darıǵa Nazarbaeva: Qazaq tili jas býynnyń tili bolyp qalyptasýy úshin orta kerek.
Bul týraly ol QR Tuńǵysh Prezıdent – Elbasy Nursultan Nazarbaev mýzeıinde ótken «Uly dala ańyzy» atty qazaq komıksteriniń tusaýkeserinde aıtty. Nursultan Nazarbaev qorynyń dırektory Darıǵa Nazarbaeva eldiń shyǵarmashyl qaýymyn qazaq komıksin damytý isine atsalysýǵa shaqyrdy, habarlaıdy Almaty-akshamy.kz.
«Búgin biz memlekettik tildi odan ári damytatyn jumysty qolǵa alyp otyrmyz. Nursultan Nazarbaev qorynyń jumysyndaǵy negizgi baǵyttardyń biri – memlekettik tildi damytý. Úlken taldaý júrgizdik. Mektepke deıingi, mektep jasyndaǵy balalarǵa, jasóspirimderge arnap jasalǵan qazaq tilindegi sapaly kontent óte az. Zamanaýı ertegiler, múltfılmder joq dese de bolady. Jas býynǵa arnalǵan kitaptar, tarıhı dúnıeler, fılmder de joq. Jalǵyz "Balapan" arnasy joq nárseniń ornyn toltyrýǵa tyrysyp jatyr. Biraq onyń da damýyna úlken qoldaý kerek. Onyń ishinde áleýeti zor jeke áriptesterdiń ınvestısıasy qajet. Sondyqtan biz osyndaı salmaqty sharýany qolǵa alyp otyrmyz», - dedi Darıǵa Nazarbaeva
Onyń aıtýynsha, qalaly ortada ósip jatqan, ýrbanızasıaǵa ushyraǵan balalarǵa memlekettik tildi úıretý ońaı emes.
«Úıimizde qazaqsha sóılesip, balalarymyzdy qazaqsha balabaqshalarǵa, qazaq synyptary men mektepterine berip jatamyz. Biraq bilim oshaǵy men úıden tys jerde orys tiliniń úlesi áli de basym. Tili qazaqsha shyqqan balalar orys tilin óte tez meńgerip ketip jatyr. Ýaqyttyń shyndyǵy osy bolyp tur. Qazaq tili jas býynnyń tili bolyp qalyptasýy úshin orta kerek. Ol orta balalardyń ana tiline degen qyzyǵýshylyǵyn tereńnen qozǵap, súıispenshilik qalyptastyrý kerek. Balalar úshin tildik orta degen birinshi kezekte kitaptar bolýy tıis. Qazir balalar kitap oqymaıdy dep jıi aıtylady. Men onymen kelispeımin», - dedi qor dırektory.
«Bizge balalarǵa arnalǵan múltıplıkasıalar, baǵdarlamalar, festıválder, qazaq anımasıasyn damytýǵa ınvestısıa kerek. Biz bul isti komıksterden bastaýdy jón kórdik. Ol komıksterdiń bastaýynda ulttyq kóne ańyzdar men tarıhı shyǵarmalar tur. Endi osylardy tolyqtyryp, jalǵastyrý úshin talantty adamdardy ortaq iske atsalysýǵa shaqyramyz. Ol adamdardyń bizge jańa, zamanaýı, sońy jaqsylyqpen túıindeletin, balanyń sanasyna ádildik pen izgilik, meıirim men sulýlyq, shynaıy mahabbat árdaıym jeńetinine sendire alatyn ertegiler ákelýi kerek. Búgingi kórme osy úlken istiń bastaýy ǵana», - dep qosty Darıǵa Nazarbaeva.