«Qaırat» komandasynyń bas bapkeri Rafael Orazbahtın «Interge» qarsy ótken Chempıondar lıgasy oıynynan keıingi baspasóz máslıhatynda jas shabýylshy Dastan Sátpaevtyń bolashaǵyna qatysty pikir bildirdi, dep habarlaıdy Aqshamnews.kz tilshisi.
Orazbahtın Sátpaevtyń oıynyna baǵa berdi.
"Ol – kúnnen-kúnge jarqyrap kele jatqan jas juldyz. Úlken áleýeti bar, sonymen qatar oıyn kezinde naǵyz jetilgen oıynshy ekenin kórsete aldy. Bıyl ol komandanyń kóshbasshylarynyń biri boldy, mańyzdy goldar soqty. Bizdiń osy kezeńge deıin jetýimizde onyń úlesi zor. Áli de ashylmaǵan múmkindigi kóp. “Chelsıdiń” oǵan kóz tigýi de tegin emes. Biraq ol alǵa jyljýǵa kómektesetin senimdi qoldarǵa túsýi kerek. Bul – onyń mansaby úshin sheshýshi sát", – dedi Orazbahtın Sports.kz basylymyna bergen suhbatynda.
Eske salaıyq, Mılan qalasyndaǵy «Djýzeppe Meassa» stadıonynda ótken Chempıondar lıgasynyń tórtinshi týr oıynynda «Qaırat» «Interden» 1:2 esebimen utylǵan edi.