Shanhaıda Almaty ákimi Darhan Satybaldy men Shanhaı meri Gýn Chjen jumys babymen kezdesti. Taraptar eki megapolıstiń saýda-ekonomıkalyq, ınvestısıalyq jáne mádenı-gýmanıtarlyq ózara is-qımylynyń negizgi baǵyttaryn talqylady.
Shanhaı meri Almatynyń seriktestikti damytýdaǵy mańyzdy torap ekenin atady. Ol bıyl Shanhaıda ótken China International Import Expo halyqaralyq kórmesine almatylyq kásiporyndardyń qatysýynyń mańyzdylyǵyna toqtaldy. Onyń aıtýynsha, Almaty kompanıalarynyń ónim usynýy yntymaqtastyqty tereńdetýge degen qyzyǵýshylyqtyń arta túskenin kórsetedi.
Gýn Chjen sonymen qatar ónerkásiptik jáne ınovasıalyq baılanysty damytý qajettiligine senim bildirip, qalalar arasyndaǵy ekonomıkalyq qatynastardy keńeıtýge zor áleýet bar ekenin aıtty.
Darhan Satybaldy Qazaqstan men Qytaı qarym-qatynasy buryn-sońdy bolmaǵan jańa, joǵary deńgeıge kóterilgenin jetkizdi.
«Biz elderimizdiń kóshbasshylary arasyndaǵy tyǵyz saıası dıalogty joǵary baǵalaımyz. Memleket basshysy atap ótkendeı, Qazaqstan men Qytaı arasyndaǵy qatynas dostyq pen strategıalyq seriktestiktiń «altyn otyz jyldyǵyna» qadam basty», — dedi Almaty ákimi.
Darhan Satybaldynyń aıtýynsha, Shanhaı – Almaty úshin strategıalyq áriptes qana emes, rýhy jaqyn qala. «Almaty men Shanhaı kóp jaǵynan uqsas: ekeýi de eliniń ekonomıkalyq, ınovasıalyq jáne týrısik ortalyǵy», — dedi Almaty basshysy.
Ákim sondaı-aq 2025 jyly jazda Almaty men Shanhaıdyń resmı túrde baýyrlas qalalar mártebesine ıe bolǵanyn eske saldy. Bul sheshim saýda, ınvestısıa, týrızm jáne bilim berý salalaryndaǵy seriktestikti keńeıtýge berik negiz qalady.
Búginde Almaty – Qytaı bıznesi men týrıseri úshin basty tartylys ortalyǵy. Qalada qytaı kapıtaly bar 5 myńnan astam kompanıa jumys isteıdi, bul Qazaqstandaǵy barlyq qytaı kásiporyndarynyń shamamen 70%-y. 2025 jyldyń alǵashqy jartyjyldyǵynda Almaty men Qytaı arasyndaǵy taýar aınalymy 7 mlrd AQSH dollarynan asyp, 20% ósti.
Taraptar seriktestikti odan ári nyǵaıtýǵa daıyn ekenin bildirdi. Darhan Satybaldy Almaty men Shanhaı arasyndaǵy yntymaqtastyqtyń úsh jyldyq josparyn ázirleýdi, sonymen birge eki qalanyń bıznesi arasynda tikeleı dıalog ornatý jáne birlesken jobalardy júzege asyrý úshin Almaty-SHanhaı iskerlik keńesin qurýdy usyndy.
Aıta keteıik, bıyl eki qala arasyndaǵy baılanysty nyǵaıtý aıasynda China Eastern Airlines áýe kompanıasy Almaty – Shanhaı tikeleı áýe baǵytyn ashty. Sonymen birge týrıser legi de ósip keledi: jyl basynan beri Almatyǵa kelgen qytaılyq týrıser sany 33%-ǵa artty.