Elshi Álim Baıel aýyl sharýashylyǵy salasyndaǵy Qazaqstan-Ázerbaıjan yntymaqtastyǵynyń zor áleýetine toqtaldy.
2024 jylǵy 25 shildede Qazaqstannyń Ázerbaıjandaǵy Elshiliginde aýyl sharýashylyǵy jáne agroónerkásip sektorlaryndaǵy ekijaqty yntymaqtastyqty jandandyrýǵa baǵyttalǵan qazaq-ázerbaıjan bıznes-forýmy ótti, dep habarlaıdy aqshamnews.kz
İs-sharaǵa Qazaqstannyń Ázerbaıjandaǵy Elshisi Álim Baıel, Ázerbaıjan Aýyl sharýashylyǵy mınıstrligi janyndaǵy Aýyl sharýashylyǵy ınovasıalar ortalyǵynyń dırektory Anar Djafarov, Qazaqstan men Ázerbaıjannyń Aýyl sharýashylyǵy mınıstrlikteriniń ókilderi, «Azyq-túlik kelisim shart korporasıasy» ulttyq kompanıasynyń basqarma tóraǵasy Asylhan Djývashev, Ázerbaıjan shaǵyn jáne orta bıznesti damytý agenttigi (KOBIA), Ázerbaıjannyń Eksport pen ınvestısıany yntalandyrý agenttiginiń (AZPROMO) ókilderi, sondaı-aq aýyl sharýashylyǵy óndirisi, mal, qus, balyq sharýashylyǵy, veterınarıa jáne organıkalyq tyńaıtqyshtar óndirisinde mamandanǵan birqatar qazaqstandyq jáne ázerbaıjandyq kompanıalar qatysty.
Elshi Álim Baıel óz sózinde Qazaqstan men Ázerbaıjan strategıalyq seriktestik aıasynda ekonomıkanyń kóptegen salalarynda tabysty ózara is-qımyl jasap jatqanyn atap ótti. Bul turǵyda ol aýyl sharýashylyǵy salasyndaǵy Qazaqstan-Ázerbaıjan yntymaqtastyǵynyń zor áleýetine toqtaldy. Jalpy, 2023 jyly Qazaqstan syrtqy naryqqa 9 mıllıon tonna astyq pen 24,4 myń tonna et eksporttaǵan.
Dıplomat sondaı-aq Islam Azyq-túlik qaýipsizdigi uıymynyń qyzmeti týraly aıtyp, Ázerbaıjannyń jaqyn arada oǵan qosylatynyna senim bildirdi. Á.Baıel Qazaqstannyń agroónerkásiptik keshenge, ásirese astyqty tereń óńdeý jáne basqa da ónimderdi óńdeý salasyna salynatyn ınvestısıalardy qoldaıtynyn atap ótti. Ol sondaı-aq Qazaqstannyń Qarabaqta aýyl sharýashylyǵy jobalaryn júzege asyrýǵa qyzyǵýshylyq tanytyp otyrǵanyn aıtty.
Óz kezeginde Anar Djafarov Ázerbaıjan eki el arasyndaǵy aýyl sharýashylyǵy kooperasıasyn damytýdyń tıimdi tetikterin qoldaýǵa daıyn ekenin atap ótti. Djafarov sondaı-aq Túrki memleketteri uıymy aıasyndaǵy elderimizdiń aýyl sharýashylyǵy salasyndaǵy jemisti yntymaqtastyǵyn atap ótti. 
Forým barysynda bıznes-qaýymdastyq ókilderi óz qyzmeti týraly aıtyp, aýyl sharýashylyǵy salasyn damytýdyń ózekti máseleleri talqylanyp, ekijaqty yntymaqtastyqty arttyrý boıynsha ıdeıalar usynyldy. Shara barysynda eki eldiń kompanıalary arasynda B2B formatynda birqatar kezdesýler ótti.