BRT degenimiz ne?
BRT – bul arnaıy jolaqpen júretin, joǵary jyldamdyqtaǵy avtobýstar jelisi. Bul kólik túri qozǵalysqa basymdyq berý júıeleri men aqyldy baǵdarshamdardyń arqasynda kepteliske túspeı, qıylystarda ýaqyt joǵaltpaı, zamanaýı júıeler arqyly kedergisiz qozǵalady. BRT aıaldamalary kóbinese qıylystarǵa jaqyn ornalasady. Bir sózben aıtqanda, bul dóńgelektegi metro, biraq qurylys shyǵyndary áldeqaıda az.
Halyqaralyq tájirıbe:
«BRT júıesin Raıymbek batyr dańǵylyna jobalaý kezinde halyqaralyq tájirıbelerge súıendik. Bul júıe turaqty ári tıimdi kólik sheshimi retinde ózin kóp elde dáleldedi. Mysaly, Kolýmbıanyń Bogota qalasynda 2000 jyly iske qosylǵan «TransMilenio» júıesi kún saıyn 300 myń jolaýshydan bastap, búginde 2,5 mıllıonnan astam adamdy tasymaldaıdy. Jolda júrý ýaqyty 32%-ǵa qysqaryp, CO₂ shyǵaryndylary 40%-ǵa azaıǵan», – deıdi «Almatybasjospar» ǴZI dırektory Asqat Sádýov.
Onyń aıtýynsha, Túrkıanyń Stambýl qalasynda 2007 jyldan beri jumys istep kele jatqan «Metrobüs» júıesi qalanyń mańyzdy kólik ınfraqurylymyna aınalǵan. Júıede 52 beket bar, uzyndyǵy 50 km, kúnine 700 myńnan astam jolaýshy tasymaldanady.
Raıymbek batyr dańǵylyna BRT engizýden kútiletin nátıje:
«Almatyda BRT engizý kólik júktemesin azaıtýdyń jáne qalalyq ómir sapasyn arttyratyn zamanaýı sheshim. Joba naqty kólik modeli men boljamdy júktemelerge negizdele otyryp jasalǵan», - dedi Asqat Sádýov.
BRT júıesi engizilgennen keıin mynadaı ózgerister kútiledi:
• Avtobýstardyń ortasha jyldamdyǵy 70%-ǵa artady
• Baǵyttar boıynsha avtobýs kútý aralyǵy 4-7 mınýt aralyǵynda bolady
• Bul baǵytta 9-ǵa jýyq iri marshrýttar (úlken syıymdylyqtaǵy avtobýstarmen) júredi
«Jibek joly – Tımırázev – Raıymbek batyr baǵytyndaǵy BRT jelileri biriktirilgen soń qalanyń joǵarǵy jáne tómengi jaǵyn jalǵaıtyn birtutas kólik magıstrali qalyptasady. Bul óz kezeginde qoǵamdyq kólikti jeke avtokólikke balama retinde qarastyrýǵa múmkindik beredi», - deıdi ýrbanıst-sáýletshi Vladıslav Fılatov.