Jyl basynan beri 778 oryndyq 12 jekemenshik balabaqsha ashyldy
Almatynyń Bostandyq aýdanynda bilim berý jáne densaýlyq saqtaý nysandarynyń qurylysy joǵary qarqynmen júrip jatyr. Bul týraly Óńirlik komýnıkasıalar qyzmetiniń brıfıńinde aýdan ákimi Altaı Rahymbetov málimdedi, dep habarlaıdy Almaty-akshamy.kz
Mysaly, osy jyldyń sáýir aıynda «Atameken» TÚK №17 qalalyq emhanasy janynan jańa dárigerlik ambýlatorıa ashyldy. Bul «Jańa Almaty» keshendi josparynyń strategıalarynyń biri – ınfraqurylymmen tyǵyz baılanysta jańa nysandar salý aıasynda júzege asyryldy. Osylaısha jańa qonystanýshylar páterlerimen birge qadamdyq qoljetimdi jerde ornalasqan áleýmettik nysandardy da qosa aldy.
Qazirgi kezde «Balalarǵa shuǵyl medısınalyq kómek kórsetý ortalyǵy» operasıalyq blogy bar qabyldaý bólimshesi korpýsynyń qurylysy júrip jatyr. Jumystardy 2022 jyldyń qazan aıynda aıaqtaý josparlanýda.
Bilim berý obektilerin damytý da basymdyqqa ıe. Qazirgi kezde, aýdan ákiminiń málimetinshe, 34 memlekettik mektep jumys isteıdi, jyl basynda tapshylyq 3 750 oqýshy ornyn qurady.
Bul máseleni sheshý úshin №38, 60, 199 mektepterge 1 625 oryndyq japsarjaı paıdalanýǵa berildi. Sonymen qatar 300 oqýshyǵa arnalǵan №191 mekteptiń japsarjaı qurylysy aıaqtala keldi.
Bıyl jazda №146 lıseı ǵımaratyna 300 oqýshy oryndyq qosalqy nysannyń qurylysy bastaldy. Sondaı-aq, №65 mektepke 400 oryndyq qosymsha qurylys salý josparlanýda.
№81 mektep-gımnazıasy men №40, 45 mektepterdi qalpyna keltirý jáne kúrdeli jóndeý jumystarymen seısmıkalyq nyǵaıtý júrgizildi. Tamyz aıynda "Orbıta-3" shaǵynaýdanyndaǵy №145 mektep ǵımaratyn qalpyna keltirý jumystary arqyly seısmıkalyq kúsheıtýge kiristi.
№21 gımnazıa aýmaǵynda 120 oryndyq jańa balabaqsha qurylysy aıaqtaldy. Sondaı-aq, №71 balabaqshany kúrdeli jóndeý aıaqtaldy. Navoı kóshesindegi №133 balabaqshada jóndeý jumystary bastaldy. Jyl basynan beri 778 oryndyq 12 jekemenshik balabaqsha ashyldy.