Almaty servıs jáne tehnologıalar kolejinde «Eńbegi adal – jas óren» jobasy aıasynda uıymdastyrylǵan «Mamandyqtar marafony» qalalyq kásibı baǵdar berý is-sharasy mektep oqýshylary arasynda keń aýqymda ótti. Bul mańyzdy bastama Almaty qalasynyń Bostandyq aýdanynda ornalasqan №37, №215, №140, №224 jáne ózge de jalpy bilim beretin mektepterdiń oqýshylarynyń qatysýymen joǵary deńgeıde uıymdastyryldy.
Atalǵan is-sharanyń basty maqsaty – mektep oqýshylaryna bolashaq mamandyqty sanaly tańdaýǵa baǵyt berý, eńbekke degen durys kózqaras qalyptastyrý, sondaı-aq jumysshy jáne qyzmet kórsetý salasyndaǵy mamandyqtardyń qoǵamdaǵy mańyzyn keńinen nasıhattaý. «Mamandyqtar marafony» jasóspirimder úshin tek baıqaý ǵana emes, óz múmkindikterin tanyp, qabiletin synaýǵa arnalǵan úlken tájirıbe alańyna aınaldy. Búgingi tańda mamandyqty durys tańdaý – árbir jas úshin asa jaýapty qadam. Osy oraıda uıymdastyrylǵan marafon mektep oqýshylaryna kásibı bilim berý uıymynyń tynys-tirshiligimen jaqyn tanysyp, naqty bir mamandyqtyń ereksheligin tájirıbe júzinde kórýge múmkindik berdi. Kolej bazasynda ótken is-shara oqýshylardyń qyzyǵýshylyǵyn arttyryp, bolashaqqa degen senimin nyǵaıtty.
Baıqaý barysynda qatysýshylar sán tehnologıasy baǵyty boıynsha birneshe nomınasıada ózara baq synady. Olar:
kıim úlgisiniń eskızin jasaý arqyly shyǵarmashylyq oılaý qabiletin;
manekende maketteý tásili arqyly kóılek modelin daıyndap, praktıkalyq sheberligin;
daıyn buıymdy sándik elementtermen bezendirý arqyly estetıkalyq talǵamyn kórsetti.
Árbir jumys – oqýshynyń óz qoltańbasy men ishki áleminiń kórinisi boldy. Ýaqytty tıimdi paıdalaný, materıaldy durys tańdaý, uqyptylyq pen jaýapkershilik – baıqaý barysynda erekshe baǵalanǵan qasıetterdiń biri boldy. Qatysýshylardyń jumystaryn tájirıbeli oqytýshylar men sala mamandarynan quralǵan qazylar alqasy muqıat ári ádil baǵalady. Baǵalaý kezinde jumystyń ıdeıalyq mazmuny, shyǵarmashylyq jańashyldyǵy, oryndalý tehnıkasy men jalpy kórkemdik deńgeıi basty nazarǵa alyndy. Bul óz kezeginde oqýshylardyń kásibı talaptardy erte sezinýine, óz eńbegine syn kózben qaraýyna múmkindik berdi. İs-sharanyń ashylý saltanatynda kolej basshylyǵy sóz sóılep, mundaı baıqaýlardyń mektep oqýshylary úshin mańyzyn erekshe atap ótti. Oqýshylardy erte jastan eńbekke baýlý, óz qabiletin tanýǵa jaǵdaı jasaý jáne mamandyq tańdaýda naqty baǵyt berý – búgingi bilim berý júıesiniń basty mindetteriniń biri ekeni aıtyldy. Sonymen qatar «Mamandyqtar marafony» jasóspirimderdiń boıynda tártip, jaýapkershilik, eńbek mádenıeti sekildi qundylyqtardy qalyptastyratyn tárbıelik máni zor is-shara retinde joǵary baǵalandy. Mundaı bastamalar oqýshylardy tek kásibı turǵyda emes, tulǵalyq jaǵynan da damytýǵa yqpal etedi.
Baıqaý qorytyndysy boıynsha úzdik jumystar anyqtalyp, qatysýshylar dıplomdarmen jáne alǵys hattarmen marapattaldy. Alaıda marafonnyń eń basty nátıjesi – júlde emes, oqýshylardyń mamandyqqa degen qyzyǵýshylyǵynyń artýy, óz bolashaǵyna sanaly kózqaraspen qaraýy boldy. Almaty servıs jáne tehnologıalar koleji osyndaı aýqymdy ári mazmundy is-sharalar arqyly mektep pen kolej arasyndaǵy baılanysty nyǵaıtyp, kásibı bilim berýdiń mańyzyn keńinen nasıhattaýdy jalǵastyryp keledi. «Mamandyqtar marafony» – adal eńbekke, kásibı sheberlikke jáne bolashaqqa senimdi qadam jasaýǵa úndeıtin mańyzdy bastamalardyń biri.
Almaty servıs jáne tehnologıalar koleji
dırektordyń oqý-tárbıe isi jónindegi orynbasary
Ártelbek Álisher Shoqanuly