Qazaqstan Respýblıkasynyń jańa Konstıtýsıasyn qabyldaý qajettigi Konstıtýsıalyq reforma jónindegi komısıanyń besinshi otyrysynda talqylandy. Májilis depýtaty Snejanna Imasheva jańa túzetýler Konstıtýsıanyń 77 babyna engizilip, negizgi zań mátininiń 84 paıyzyn jańartatynyn, is júzinde barlyq bólim qamtylatynyn aıtty.
Imasheva baıandamasynda jobanyń Preambýlasyn tolyq jańa redaksıada qabyldaý, jańartylǵan jalpyulttyq qundylyqtar, memlekettiń mısıasy, tarıhı kontekst pen eldiń odan ári damý baǵyttaryn kórsetý kózdeletinin atap ótti. Sonymen qatar «Halyq keńesi» jáne «Konstıtýsıaǵa ózgerister men tolyqtyrýlar engizý» atty eki jańa bólim engizilip, tórt bólimniń ataýy men mazmunyna ózgerister engizilmek.
«Konstıtýsıalyq qurylymnyń negizderi eleýli túrde qaıta qaralyp, prezıdenttik basqarý nysany saqtala otyryp, biryńǵaı memlekettik bılik júıesiniń uıymdastyrylýy ózgeredi. Azamattardyń memleket isin basqarýǵa qatysý nysandary keńeıtilip, adam men azamattyń quqyqtary men bostandyqtaryn qorǵaý kepildikteri kúsheıtiledi, Konstıtýsıalyq Sottyń Konstıtýsıanyń ústemdigin qamtamasyz etýdegi róli arta túsedi. Osylaısha, sóz jekelegen túzetýler týraly emes, Negizgi zańnyń mazmuny men tujyrymdamalyq tásilderin túbegeıli ózgertetin tereń konstıtýsıalyq jańǵyrtý týraly bolyp otyr»,- dedi depýtat.
Depýtat sonymen qatar «Quqyqtyq aktiler týraly» Zańnyń 26-babynyń 9-tarmaǵyn eske salyp, normatıvtik aktiniń jartysynan astamy ózgerse, onyń jańa redaksıasy qabyldanatynyn atap ótti. Osyǵan súıene otyryp, jańa Konstıtýsıa qazirgi zaman talaptaryna, qoǵam suranysyna jáne memlekettiń strategıalyq damý maqsattaryna saı keletini, tek quqyqtyq negizdi ǵana emes, sonymen birge azamattyq qundylyqtar men memlekettiń strategıalyq baǵytyn kórsetetin qujat ekeni kórsetildi.