Almaty qalasynda polısıa qyzmetkerleri óz betinshe áreket etýge baılanysty zańsyz is-áreketter jasady degen kúdikpen bir top azamatty ustady, - dep habarlaıdy aqshamnews.kz.
Polisia.kz habarlaýynsha, tergeý materıaldaryna sáıkes, birneshe adam turǵyn úı-jaıǵa zańsyz kirip, ıelerine kúsh qoldanyp, óz talaptaryn oryndatýǵa tyrysqan. Quqyqqa qaıshy áreketter barysynda kúdiktiler syrtqy beınesi atys qarýyna uqsas zatty paıdalanǵan. Bul jaıt azamattardyń ómiri men densaýlyǵyna naqty qaýip tóndirgen. Jedel-tergeý is-sharalarynyń nátıjesinde atalǵan qylmysqa qatysy bar barlyq tulǵalar anyqtalyp, ustaldy. Qaýip tóndiretin zattar zańsyz aınalymnan alynyp, tárkilendi. Atalǵan derek boıynsha qylmystyq is qozǵalyp, qazirgi ýaqytta kúdiktilerge qatysty sotqa deıingi tergep-tekserý amaldary júrgizilip jatyr.
Almaty qalasy polısıa departamentiniń uıymdasqan qylmysqa qarsy is-qımyl basqarmasynyń bastyǵy Janat Nurǵalıev bul týraly bylaı dedi:
- Biz kúsh qoldaný men qorqytý arqyly bóten múlikke qol suǵýǵa tyrysqan toptyń zańsyz áreketine tosqaýyl qoıdyq. Mundaı óz betinshe áreket etýge jol berilmeıdi. Polısıa árbir turǵynnyń qaýipsizdigin qamtamasyz etý úshin júıeli túrde jumys júrgizedi. Zań talaptaryn buzǵan árbir azamat zań aıasynda jaýapkershilikke tartylady. Sonymen qatar azamattardyń ýaqtyly habarlamalary jedel ári tıimdi sharalar qabyldaýǵa múmkindik beretinin erekshe atap ótkim keledi, – dep túıindedi ol.