Májilis depýtaty Aıdos Sarym jańa birpalataly Parlament – Quryltaıdy qalyptastyrýda proporsıonaldyq júıesin qoldaıtynyn aıtty, - dep habarlaıdy Aqshamnews.kz.
Konstıtýsıalyq reforma jónindegi komısıanyń besinshi otyrysynda bul júıeniń naqty artyqshylyqtaryn da atap ótti.
Ol QR jańa Konstıtýsıasynyń jobasyna sáıkes bolashaq Quryltaı biryńǵaı jalpyulttyq saılaý okrýginiń aýmaǵy boıynsha proporsıonaldyq ókildik júıe boıynsha qurylatynyn aıtty.
«Partıalyq-proporsıonaldyq júıege kóshý azamattarymyzdyń múmkindigin azaıtady, olardy elimizdiń joǵarǵy zań shyǵarýshy organyna saılaný quqyǵynan aıyrady degen pikirler bar. Meniń oıymsha, bul óte jańsaq pikir, qate túsinik», - dedi Aıdos Sarym.
Ol qazirgi ýaqytta Belgıa, Ispanıa, Fınlándıa, Shveısarıa, Bolgarıa, Shvesıa, Norvegıa, Nıderlandy sıaqty Eýropa elderinde partıalyq-proporsıonaldyq saılaý júıesi jumys jasap jatqany, sondaı-aq mundaı júıeniń Argentına, Brazılıa, Bolıvıa, Ekvador, Izraıl jáne Indonezıada da qoldanylatyny jóninde málimet berdi.
«Bul elderdiń saılaýshylary, zań shyǵarýshylary men zańgerleri osy júıe azamattarynyń saılaý nemese saılaný quqyǵyn qandaı da bir túrde kemsitedi dep sanamaıdy. Bul qalypty, salaýatty halyqaralyq tájirıbe», - dep túsindirdi depýtat.
Aıdos Sarym sarapshylar atap ótken proporsıonaldyq júıeniń majorıtarlyq júıemen salystyrǵandaǵy naqty artyqshylyqtaryn sanamalap berdi:
– ádilet faktory – partıalar saılaýshylar olar úshin qansha daýys berse, Parlamentte sonsha oryn alady. Majorıtarlyq depýtattar jumys istep turǵan fraksıalarǵa qosylý arqyly halyqtyń qalaýyn burmalaı almaıdy;