Halyqaralyq olımpıada júldegerleri «Bolashaq» stıpendıasyn endi avtomatty túrde alady.
Ǵylym jáne joǵary bilim mınıstri Saıasat Nurbek kezekti bergen suhbattarynyń birinde «Bolashaq» baǵdarlamasyna qatysty úsh negizgi ózgeristi atap ótti, dep habarlaıdy Almaty-akshamy.kz Egemen.kz-ke silteme jasap.
Birinshi kezekte, Qazaqstan «Bolashaq» baǵdarlamasymen qaıtadan bakalavr mamandaryn daıyndaıdy. «Bolashaq» baǵdarlamasynan bul fýnksıa 12 jyl buryn alynyp tastalǵan edi. Qazir tek magıstrler daıyndalady.
«Qazir «Nazarbaev mektebiniń túlegi álemniń 26 joǵary oqý ornyna tústi» ne «Bilim-Innovasıa mektebiniń túlegi 17 oqý ornynan shaqyrý aldy» degendeı jańalyqtardy jıi estımiz. Álemde daryndy balalardy tartýda báseke bastaldy. Bizdiń mundaı talanttarymyzdy shetel alyp ketip jatyr. Muny boldyrmas úshin halyqaralyq olımpıada, saıystardyń júldeli oryn ıelerine «Bolashaq» stıpendıasyn avtomatty túrde berýdi kózdep otyrmyz. Alsyn, oqyp qaıtsyn. Esesine, olarda elge kelip, alǵan bilimin jumyspen óteý jóninde mindetteme bolady», - dedi mınıstr.
Ekinshi ózgeris – «Bolashaq» baǵdarlamasy jumys berýshilermen tikeleı ushtastyrylady. Jumys berýshi kompanıa qajet kadrlardy daıyndaýǵa tapsyrys beredi, sáıkesinshe keıin olarǵa jaýapkershilik te jumys berýshige júkteledi.
«Buryn baǵdarlamaǵa kez kelgen úmitker qatysa alatyn bolsa, endi tapsyrysty kompanıalar beredi. Aıtalyq, «Qazatomónerkásip» ıadrolyq energetıka boıynsha ózine qajet mamandar tizimin beredi. Biz tapsyrysty qabyldap, olardy oqytýǵa laıyq álemdegi úzdik oqý oryndaryn, zerthanalaryn taýyp, oqytamyz da «Qazatomónerkásipke» qaıtaryp beremiz. Sol mamandarǵa jaýapty «Qazatomónerkásip» bolady», - dedi Saıasat Nurbek.
Úshinshi ózgeris – aldaǵy ýaqytta jalpy grant sanynyń 60 paıyzy tehnıkalyq mamandyqtarǵa beriledi.
«Medısına, tehnıka jáne taǵy basqa eń qajet degen salalarǵa maman daıyndaýǵa mán beremiz. Bizde «Bolashaqpen» bilim alyp, onyń áleýetin durys paıdalanbaı júrgender negizinen gýmanıtarlyq sala mamandary. Olardyń sany shekteledi», - dep túıindedi ol.
Sondaı-aq mınıstr endi grant sany shektelip, sapaǵa mán beriletinin atap ótti.