Básekelestik óte joǵary bolǵany sonshalyq, irikteýde kimniń Azıa chempıonatyna baratynyn anyqtaý bapkerlerge qıynǵa tústi. Bul týraly Almaty-akshamy.kz Inbusiness.kz-ke silteme jasap habarlaıdy.
Áıelderdiń izin ala Iordanıa astanasy Ammanda ótetin bokstan Azıa chempıonatynda baq synaıtyn Qazaqstan erler quramasy belgili boldy, dep habarlaıdy Sportty damytý dıreksıasynyń baspasóz qyzmeti.
Qaırat Sátjanov shákirtteri Almaty oblysynyń Báıterek aýylyndaǵy ortalyqta oqý-jattyǵý jıynyn ótkizip, sheshýshi jekpe-jekterge daıyndaldy. Týra 10 kúnge sozylǵan daıyndyq 28-qazanda aıaqtaldy. Oqý-jattyǵý aıaqtala salysymen sol kúni-aq Ulttyq quramamyz Iordanıaǵa attandy.
"Daıyndyq óte jaqsy ótti. QR MSM Sport jáne dene shynyqtyrý isteri komıteti, Sportty damytý dıreksıasy men Qazaqstan boks federasıasynyń arqasynda báseke qarsańynda eshqandaı qıyndyq bolǵan joq. Boks elimizde keń tanylǵan, únemi jankúıerler nazarynda bolatyn sport túri. Aldyńǵy qurlyq dodasynyń nátıjesin qoǵamnyń qalaı talqylap, synǵa alǵany áli esimizde. Dýbaıda erler quramasy altynsyz qalǵanyn bilesizder. Bıyl biz ese qaıtarǵymyz keledi. Maqsat - jalpy esepte kósh bastaý", - dedi Sportty damytý dıreksıasyna bergen suhbatynda bas bapker Qaırat Sátjanov.
Bokstan XXXII Azıa chempıonaty 30 qazan men 13 qarasha aralyǵynda ótpek. Erler 13, al áıelder 12 salmaqta synǵa túsedi. Sary qurlyq dodasyn ádettegideı Azıa boks konfederasıasy (ASBC) Halyqaralyq boks qaýymdastyǵynyń (IBA) erejelerin negizge ala otyryp uıymdastyrady.
Ammanda judyryqtasatyn boksshylar tizimi: Sanjar Tashkenbaı (48 kg), Sáken Bıbosynov (51 kg), Mahmud Sabyrhan (54 kg), Serik Temirjanov (57 kg), Samatáli Tóltaev (60 kg), Sanatáli Tóltaev (63,5 kg), Dýlat Bekbaýov (67 kg), Aslanbek Shymbergenov (71 kg), Nurqanat Raıys (75 kg), Nurbek Oralbaı (80 kg), Saǵyndyq Toǵanbaı (86 kg), Aıbek Oralbaı (92 kg), Qamshybek Qońqabaev (+92 kg).