Májilis depýtaty Elnur Beısenbaev áleýmettik jeliler arqyly zańsyz lotereıa uıymdastyryp, mıllıardtaǵan qarjy jınaǵan psevdoblogerlerdiń áreketterine toqtaý salýdy surady. Ol depýtattyq saýalyn Májiliste premer-mınıstr Oljas Bektenovke joldady, - dep habarlaıdy Aqshamnews.kz tilshisi.
Depýtattyń aıtýynsha, halyqty aldap, zańsyz jolmen baılyqqa jetip júrgen blogerlerdiń áreketi - qoǵam úshin úlken qater. 2024 jyly zańsyz lotereıa uıymdastyrǵan 101 adamǵa 41 mln teńge aıyppul salynsa, 2025 jyldyń basynan beri taǵy 79 adam ákimshilik jaýapkershilikke tartylyp, 33,1 mln teńge aıyppul óndirilgen.
Beısenbaevtyń aıtýynsha, keıbir ınflúenserler ýaqytsha kompanıalar quryp, paıdasyz vıdeokýrstar satý degen syltaýmen zańsyz utystar uıymdastyrýdy ádetke aınaldyrǵan. Olar halyqty tartý úshin páter, avtokólik, smartfon, tipti záýlim kotejder tigedi. Mysaly, oqyrmandary 3 mıllıonǵa jýyq Darhan Jolshybekov Instagram arqyly 300 mıllıon teńge turatyn úıge utys oınatyp, shamamen 1,5 mlrd teńge jınaǵan. Sondaı-aq, «supermamasita» akkaýntynyń ıesi Álıa Baıtýǵaeva birneshe ret baǵaly syılyq oınatyp, 500 mıllıon teńge qarjy tapqan. Al «Justking31» jáne «AminaXO» akkaýnttarynyń ıeleri 1,5 mlrd teńgege jýyq qarajat jınaǵan.
Depýtat jalǵan blogerlerdiń qýlyǵyn áshkereleı otyryp, Astanada Erbolat Janabylovtyń isi qaralyp jatqanyn da eske saldy. Ol «oqý kýrstaryn» satý arqyly 10 avtokólik pen ózge de syılyqtarǵa utys uıymdastyryp, 180 mln teńge tapqan.
Sonymen qatar, Beısenbaev ýákiletti organdardyń mundaı alaıaqtardyń naqty tabysyn esepteı almaı otyrǵanyn, sonyń saldarynan zańsyz jolmen alynǵan qarjyny tárkileý múmkin bolmaı jatqanyn synǵa aldy.
Osyǵan baılanysty depýtat mynadaı usynystaryn jetkizdi:
- qylmystyq jaýapkershilikke tartý úshin kiris kóleminiń shegin tómendetý,
- zańsyz lotereıadan túsken qarjy kólemin ashyq jarıalaý,
- onlaın-mektepterdiń qyzmetin barynsha ashyq etý,
- sondaı-aq Memlekettik kirister komıtetiniń blogerler tabysy týraly málimetti quzyrly mınıstrlikke berýdi mindetteý.