Jaýapkershilikti túsine almaıtyn blogerlerdiń sany ýaqyt ótken saıyn artyp barady.
Osylaı degen Májilis depýtaty Anas Baqqojaev blogerlerdiń jaýapkershiligin zańnamalyq turǵyda bekitýdi usyndy, dep habarlaıdy Almaty-akshamy.kz
Depýtattyń aıtýynsha, qazir áleýmettik jelilerdi paıdalanyp, jalǵan aqparat taratatyn blogerler úshin eshqandaı jaýapkershilik qarastyrylmaǵan.
Onyń sózinshe, qazir ózin blogermin dep júrgenderdiń deni – aqparattyń ras-ótirigin teksermeı, ońaı jolmen baıý maqsatynda kez kelgen adamǵa jala jabýdan taıynbaıtyn, bopsalap aqsha tabatyn, ataqqumar, eldiń berekesin buzyp, qaýipsizdigine qater tóndiretin saýatsyz adamdar.
"Dál osy blogerler talaı jyldan beri umyt bolǵan qarjylyq pıramıdanyń jandanýyna da sebep bolǵanyn bárimiz jaqsy bilemiz. Sol alaıaqtarǵa senip qalǵan qanshama adam sýısıd jasady, qanshasy densaýlyǵynan aıyryldy, taǵy qanshasy úısiz-kúısiz qalyp, qańǵyryp ketti?! Olardyń obaly kimge? Elde bolyp jatqan túrli áleýmettik jaǵdaılardy óz yńǵaıyna burmalap, oǵan ultaralyq reń berip, elge jalǵan aqparat taratqan blogerlerdiń de isi maıshammen qaralýy kerek edi. Rastalmaǵan qaýesettiń áleýmettik jeli arqyly tez taraýynan Qordaı oqıǵasynyń nemen aıaqtalǵany bárińizge málim", - dedi Baqqojaev Premer-Mınıstr men Bas prokýrorǵa joldaǵan depýtattyq saýalynda.
Aıtýynsha, jeke azamattardyń ishken-jegenin, kıgen kıimine deıin ańdyp, qoǵamda kıberbýllıng jasap júrgen blogerler toby taǵy bar. Ómirge degen kózqarasy endi qalyptasyp kele jatqan jastar osy blogerlerge eliktep júr.
"Biz qysqa ǵana ýaqyt ishinde sózi men isine jaýap bere almaıtyn blogerlerdiń otanyna aınalyp ketkendeımiz. Bul – qoǵam úshin de, memleket úshin de qaýipti qubylys. Al, munyń bári bizdegi zańnamada bloger mártebesi aıqyndalmaǵannan. Jaýapkershiliktiń joq ekenin sezingen mundaı adamdar, árıne, oıyna kelgenin isteıdi", - dep ashyndy depýtat.
Bul rette Baqqojaev kópke topyraq shashýdan aýlaq ekenin, halyqqa shyn janashyr blogerler de bar ekenin atap ótti.
"Biraq, áleýmettik jelilerin paıdalanyp, azamattar men uıymdardyń quqyǵy men zańdy múddelerine zıan keltiretin jalǵan aqparat taratqany úshin olarǵa qoldanylatyn shara qarastyrylmaǵan. Sol sebepti olarda eshqandaı jaýapkershilik joq. Artyn zerttep, shyndyq pa, joq pa bastaryn qatyrmaıdy. Bastysy shý. Bastysy sóz. Kimniń bolmasyn aldynda tikeńdep, betten alyp, jeke basyna tıisedi. Sóz bostandyǵy degen osy ma? Biz osylaısha tutastaı bir mamandyqty qor qylyp otyrmyz. Jýrnalıserdiń kóbi jumyssyz! Olardyń bilimi de, talaby da bar. Olardyń blogerlerden aıyrmashylyǵy – ádepti, sondyqtan da jumyssyz", - deıdi májilismen.
Ol bir jyl buryn Prezıdent memlekettiń múddesin, qoǵamnyń suranysyn jáne medıasalanyń damý úrdisin eskerip, "BAQ týraly" zańdy qaıta qaraýdy tapsyrǵanyn eske saldy. Alaıda, aıtýynsha, bul zań áli daıyn emes.
"Sondyqtan, birinshiden, atalǵan zań jobasyna jaýaptylardyń áreketine tıisti baǵa berilýi kerek. Ekinshiden, tez arada "BAQ týraly" zańdy pysyqtap, Májilistiń ashyq talqylaýyna engizý qajet. Aqparat salasyndaǵy jaýapkershilikti tek jýrnalıser emes, blogerler de sezinetin ýaqyt jetti", - dedi Baqqojaev.
Depýtat blogerlerdiń jaýapkershiligin osy zań jobasy aıasynda dereý qarastyrý qajet ekenin aıtty. Sebebi jaýapkershilikti túsine almaıtyn blogerlerdiń sany ýaqyt ótken saıyn artyp barady.