Armenıa, Belgıa, Egıpet, Kanada, Rýmynıa, Fransıa, Shveısarıa elderiniń Qazaqstandaǵy elshileri Ortalyq komýnıkasıalar qyzmeti alańynda «Frankofonıa kóktemi – 2023» mádenı is-sharalar maýsymyn tanystyrdy.
Halyqaralyq frankofonıa kúniniń maqsaty – fransýz tilin unatatyndardy biriktirý, fransýz mádenıetin nasıhattaý. Fransıa usynatyn is-sharalar týraly osy eldiń Qazaqstandaǵy elshisi Dıde Kaness aıtty, dep habarlaıdy Almaty-akshamy.kz Elorda.info saıtyna silteme jasap.
Onyń sózinshe, bıyl Qazaqstanda «Frankofonıa kóktemin» 9 elshilik uıymdastyrady.
«Álemde 320 mıllıonnan astam adam fransýz tilinde sóıleıdi. Bul óte kóp. Fransýz tili - 29 memlekette resmı til mártebesine ıe, álemdegi eń kóp taralǵan besinshi til. Sonymen qatar fransýz tili ınternette qoldanylatyn tórtinshi til jáne álemde eń kóp oqylatyn ekinshi til bolyp sanalady», – dedi elshi.
İs-sharalar Astana, Almaty, Atyraý, Qaraǵandy, Qostanaı, Óskemen jáne Shymkent qalalarynda ótedi.
Fransıa frankofondy kıno aptalyǵy aıasynda 9 fılm kórsetedi.
Sondaı-aq 7 naýryzda Almatyda «Áıelderdiń sporttaǵy orny» fılmi kórsetiledi, odan keıin áıelder quqyǵyn saqtaý taqyrybynda talqylaý ótedi.
Elshi 2024 jyly Fransıada ótetin Olımpıada oıyndaryna 500 kún qalǵanda Almaty qalasynda mektep oqýshylarynyń qatysýymen estafeta uıymdastyrý josparlanyp otyrǵanyn aıtty.
«Bıyl festıvál baǵdarlamasyna art-rezıdensıany qostyq, onyń aıasynda jas fransýz sýretshisi úsh aı boıy Almatyda bolady. Rezıdensıa aıaqtalǵannan keıin shyǵarmashylyq jumystar «Esentai» galereıasynda kópshilik nazaryna usynylady», – dedi Dıde Kaness.