Mashına jasaý óńdeýshi ónerkásiptiń negizgi sektorynyń biri retinde onyń jalpy kóleminiń 19%-yn qamtamasyz etedi.
Ósýdiń negizgi draıverleri: avtomobıl (+12,1%), temirjol jáne basqa da kólik quraldary (+7,1%), aýyl sharýashylyǵy tehnıkasy (+1,3%), elektrotehnıka (+21,5%), kompúter, elektrondyq jáne optıkalyq jabdyq (ósim 1,7 ese) óndirisi, sondaı-aq mashına jáne jabdyq jóndeý men ornatý (+12%), dep habarlaıdy aqshamnews.kz.
Avtomobıl jasaý mashına jasaý kóleminiń shamamen 41%-yn beredi. Búginde elimizde JAC, Chevrolet, KIA, Lada, Jetour, Hongqi, Skoda, Hyundai jáne Genesis brendterin shyǵaratyn eki avtozaýyt jumys isteıdi.
Bıyl Qazaqstanda taǵy eki jańa kásiporyn — Almatydaǵy mýltıbrend zaýyty men Qostanaıdaǵy KIA zaýyty iske qosylady. Almatyda CHANGAN, Haval jáne CHERY sıaqty brendterdiń avtomobılderin shyǵarý josparlanýda.
«Jańa qýattardy paıdalanýǵa berýdiń arqasynda elimizde shaǵyn toraptyq tehnologıa boıynsha jınalatyn avtomobıl óndirisiniń kólemi edáýir artady. Bul modelder qataryn kóbeıtýge jáne otandyq avtoónerkásiptiń pozısıasyn nyǵaıtýǵa múmkindik beredi», — dedi ónerkásip jáne qurylys vıse-mınıstri Oljas Saparbekov.
2025 jyly Qazaqstanda 147 824 avtomobıl shyǵarý josparlanýda. Alaıda, vıse-mınıstr atap ótkendeı, salada bul kórsetkishten asyp túsýdiń barlyq alǵysharty bar.
Onyń aıtýynsha, otandyq taýar óndirýshilerge sertıfıkat berýge baılanysty prosesti ońtaılandyrý kezinde qosymsha ósý múmkindigi joǵary.
Vıse-premer Serik Jumanǵarın saýda jáne ıntegrasıa mınıstrligine qajetti ruqsat qujattamasyn jedel berý úshin shara qabyldaýdy tapsyrdy. Bul jańa modelderdiń serıalyq óndirisin ýaqtyly iske qosýǵa jáne qýattardyń júktemesiniń artýyn qamtamasyz etýge múmkindik beredi.
Temirjol sektory mashına jasaý qurylymynda 13%-dy alady. 2024 jyly Qazaqstanda jalpy somasy 599,3 mlrd teńgege 125 lokomotıv jáne 2,7 myńnan astam vagon óndirildi. Búginde osy segmentte Astana, Petropavl, Ekibastuz jáne Atyraýda ornalasqan bes óndiristik kásiporyn jumys isteıdi.
Bıyldan bastap Astanada «Stadler Kazakhstan» zaýyty jumysyn bastady. Onyń iske qosylýy salany transformasıalaý men oqshaýlaýdy arttyrýdyń mańyzdy kezeńin jol ashyp otyr.
Jyljymaly quramdy jańartý úshin Kólik mınıstrligi qyzmet etý merzimi uzartylǵan vagondardy paıdalanýǵa shekteý engizýge bastamashy boldy. Tıisti normatıvtik qujat ázirlenip, kelisý rásiminen ótýde.
Mashına jasaýdyń jalpy kóleminiń shamamen 9%-y elektrotehnıkalyq ónimge tıesili. 2024 jyly Qazaqstanda 270 myńnan astam turmystyq tehnıka óndirildi.
Osy jyldan bastap elimizde Samsung brendimen teledıdar men kir jýǵysh mashına óndirisi bastalady. Bul ımportty almastyrý, oqshaýlaýdy arttyrý jáne Qazaqstan aýmaǵynda shyǵarylatyn ónim assortımentin keńeıtý baǵytyndaǵy mańyzdy qadam bolmaq.