Onyń 40 paıyzy - qazaq kınosy enshisinde
HVI Halyqaralyq «Eýrazıa» kınofestıvaliniń baspasóz ortalyǵynda «Qazaqstandyq kınony damytý vektory» taqyrybynda dóńgelek ústel bolyp ótti. Onda «Kınematografıa týraly zań», otandyq kınony prokattaý jáne ilgeriletý, koprodýksıaǵa shyǵý jáne basqa da kıno salasyndaǵy bizdiń kınematografısterdi tolǵandyratyn ózekti máseleler talqylandy.
Jıynda birinshi bolyp sóz sóılegen «Qazaqfılm» kınostýdıasynyń vıse-prezıdenti Serik Ábishev «Kınematografıa týraly» zańǵa qatysty máselelerge keńinen toqtaldy.
Ol atap ótkendeı, zań bar, biraq onyń jumys isteý tetikteri joq.
«Júıe óte kúrdeli. Munda ǵylymı kózqaras, zertteý, taldaý qajet. "Kıno týraly" zań QR basqa zańdarymen pysyqtalýy, basqa mınıstrliktermen baılanysy bolýy tıis. Sonda ǵana ol naqty jumys isteıtin bolady», - deıdi ol.
Prodúser Zarına Kısıkova óz kezeginde «Kınematografıa týraly» zań aıasynda jumys isteýge májbúr bolǵan otandyq kınematografısterdiń qandaı qıyndyqtarǵa tap bolatynyn aıtyp berdi.
Aıdos Seıitjan bolsa, derekti kınonyń problemalaryn kóterdi.
Dóńgelek ústeldiń otandyq kınoprokat taqyrybyna arnalǵan ekinshi bóligi odan da qyzý pikirtalas týdyrdy. UKQMO basqarma tóraǵasynyń orynbasary Baýyrjan Shókenov qazirgi zamanǵy otandyq naryqtyń artyqshylyqtary men kemshilikteri týraly egjeı-tegjeıli aıtyp, problemalar bar ekenin, olardyń sheshilip jatqanyn jáne memleket tek óndiriske ǵana emes, sonymen qatar qazaqstandyq fılmderdi ilgeriletýge de kóp kóńil bólip jatqanyn atap ótti.
Shókenovtiń aıtýynsha, 2022 jyly (qarashaǵa deıin) Qazaqstannyń prokat naryǵy 20 mıllıard teńgeniń deńgeıine jetti, bul pandemıaǵa deıingi kórsetkishke jaqyn.
15 mıllıon bılet satyldy, ortasha bılet baǵasy 1300 teńgeniń tóńireginde, bul negizinen onsha qymbat emes.
«Eń qyzyǵy, osy 20 mıllıardtyń qyryq paıyzyn, ıaǵnı 8 mıllıardqa jýyǵyn otandyq fılmder jınaǵan. Bıyl prokatqa shyqqan 450 fılmniń 64-i otandyq. Bul fılmderdiń jalpy sanynyń 14 paıyzy jáne olar bizge paıdanyń 40 paıyzyn berdi. Bul - orasan zor kórsetkish», - dep atap ótti ol.