Atyraýda búdjetten 3 mlrd teńgeden astam qarjy jumsalǵan konsert zalynyń qurylysy áli aıaqtalmaı tur
Jaýaptylar 10 jyl buryn bastalǵan 1200 oryndyq nysannyń bólikteri jaramsyz bolyp qalǵanyn aıtady. Ǵımaratty qaıta qolǵa alý úshin taǵy 5 mlrd teńge qajet, dep habarlaıdy Almaty-akshamy.kz Inbusiness.kz-ke silteme jasap.
Qazyna qarjysy jumsalǵan bul nysanda jumystar 2011 jyly bastalǵan. Erekshe arhıtektýralyq ǵımarat úshin sol kezdegi óńir ákimi Bergeı Rysqalıevtiń basy úlken daýǵa qalǵan edi. Sebebi merdiger kompanıanyń ústinen is qozǵalyp, jobaǵa artyq aqsha aýdarylǵany anyqtalǵan.
"Smetalyq baǵasy konsert zalynyń 3 mlrd 800 mln. Qurylys toqtatqan ýaqytta 2012 jyly 2,3 mlr joıylyp ketken konsert zalynyń. Sony tekserý kezinde 1 mlrd artyq ketip qalǵany anyqtaǵan sol kezde. Ol keri qaraı qaıtaryldy ma, qaıtarylmady ma ol jaıly málimet joq", deıdi Oblystyq qurylys basqarmasynyń bólim basshysy Nurlybek Saqparov.
Qazir konsert zaly suryqsyz kúıde. Terezeleri synyp, temirlerin tot basqan. Qaraýsyz qalǵan aýmaqta qoqys kóp. Jaýaptylar 10 jyl buryn salynǵan nysan bólikteriniń jaramsyz ekenin moıyndaıdy. Qazir ony basqarma balansyna alýǵa kúsh salyp jatqan kórinedi. Biraq nátıje az. Shendiler aryzda qatelik jibergendikten, sot ruqsat etpeı otyr.
"Snaboılstroı JSHS-nen Atyraý oblysy qurylys basqarmasy MM-ne qabyldaý-tapsyrý aktisiniń bolý faktisin anyqtaýdy suraǵan. Atyraý qalalyq sotynyń 2022 jyly 5 qazandaǵy uıǵarymymen atalǵan aryzdy qabyldaýdan bas tartylǵan. Sebebi aryzdanýshynyń qoıǵan máselesi sotpen anyqtalýǵa jatatyn zańdyq mańyzy bar faktiler jatpaıdy. Uıǵarymda taraptardyń memlekettik satyp alý shartyn daýlaýǵa quqyly ekendigi túsindirildi", dedi Atyraý oblystyq sotynyń baspasóz hatshysy Meıramgúl Óteǵulova.