Búgin, 15 tamyz Almatyda «Qazaqstan halqy Assambleıasy men Konstıtýsıa: birlik pen kelisim jolyndaǵy úsh onjyldyq» taqyrybynda kezdesý ótti. Mazmundy jıynǵa Qazaqstan halqy Assambleıasy men Almaty qalasy Máslıhatynyń «Yntymaq» depýtattyq toby ókilderi, «Qazaqstan Respýblıkasynyń Ulttyq ulany» respýblıkalyq memlekettik mekemesiniń oqytýshylary men kýrsanttary qatysty.
İs-shara Qazaqstan Respýblıkasy Konstıtýsıasy men Qazaqstan halqy Assambleıasynyń 30 jyldyǵyna, sondaı-aq 2025 jyly jarıalanǵan jumysshy mamandyqtar jylyna oraı uıymdastyryldy.
– Búgingi júzdesýimizdiń basty maqsaty – Ata zańymyzdyń 30 jyldyǵynyń qarsańynda Assambleıanyń atqarylyp jatqan jumystarymen tanystyrý. Ári, kezdesý arqyly bir-birimizdi túsinip, elimizdiń yntymaǵy men birligi jarasqan memlekettiń qataryna qosý úshin jaǵdaı jasaý. Qazaqstandaǵy ár ult ókilderi bir ata men bir ananyń balasyndaı tatý, bizge qyzyǵa da, qyzǵana qaraıtyn elder kóp. Birlik, yntymaq bar jerde biz damyǵan ári ekonomıkasy joǵary memleketterdiń qataryna qosyla alamyz. Halyq qaharmany Baýyrjan Momyshuly aıtqandaı, «Zańǵa baǵynǵan el qul bolmaıdy». Sondyqtan qandaı laýazymdy tulǵa bolsa da, bári zańǵa birdeı baǵynýy kerek, – dedi Qazaqstan uıǵyrlarynyń respýblıkalyq etnomádenı ortalyǵynyń tóraǵasy, Qazaqstan halqy Assambleıasy Keńesiniń múshesi Dolkýntaı Alıev.
Almaty qalalyq Qazaqstan halqy Assambleıasy tóraǵasynyń orynbasary, «Qazaqstan orys mádenı ortalyǵy» qoǵamdyq birlestiginiń tóraǵasy Vsevolod Lýkashev QHA-nyń qoǵamdyq róline toqtaldy:
– Qazaqstan halqy Assambleıasy – úlken qurylym, konstıtýsıalyq mártebesi bar uıym. Birinshiden, bul – elimizdiń eń kórnekti azamattary, shyǵarmashylyq zıaly qaýym ókilderi, mádenıet pen ǵylym qaıratkerleri toǵysqan orta. Ekinshiden, bul – etnomádenı birlestikterdiń ókilderi. Álem men Qazaqstandaǵy tynyshtyq pen patrıotızm júrekten bastalady. Elimizde etnostardyń bedeldi ókilderinen turatyn Aqsaqaldar keńesi bar. Ádette, jasy úlken jáne orta býyn ókilderi etnos ishindegi kez kelgen máselelerdi sheshe alady. Sonymen qatar, zańdy mártebesi bar qurylym – medıasıa keńesi de bar. Bul keńeste barlyq daýlar sotqa deıingi tártippen sheshiledi, – dedi Vsevolod Lýkashev.
El birligin saqtaý eldegi barlyq azamatqa ortaq jaýapkershilik. Bul – tek memlekettik organdardyń ǵana emes, árbir otbasynyń, árbir jastyń, ár ult ókiliniń ortaq mindeti. Birligimiz – beıbit ómirdiń, turaqty damýdyń kepili. Sondyqtan tatýlyqty tý etip, ózara túsinistik pen qurmetti negizgi qundylyq retinde baǵalaý búgingi áleýmettik ómirdiń basty urany bolsa kerek.