Aısultan Seıitovtyń «Qash», Darhan Tólegenovtyń «Aǵaıyndy» jáne Asqat Kýchınchırekovtyń «Baýyryna salý» kartınalary «Azıalyq Oskar» dep atalatyn bedeldi Asia Pacific Screen Awards syılyǵyna úmitkerler qataryna kirdi.
Aısultan Seıitovtyń kartınasy birden eki nomınasıada usynylǵan – «Úzdik fılm» jáne «Úzdik operatorlyq jumys». Basty nomınasıada ol Japonıadan, Qytaıdan jáne Grýzıadan kelgen kartınalarmen talasqa túsedi, olardyń arasynda bıylǵy Venesıa kınofestıvalinde Qazylar alqasynyń arnaıy júldesiniń ıegeri atanǵan Rúsýke Hamagýtıdiń «Zulymdyq joq» atty týyndysy da bar, dep habarlaıdy almaty-akshamy.kz.
Al Darhan Tólegenov pen Asqat Kýchınchırekov «Úzdik rejıser» jáne «Úzdik jastar fılmi» nomınasıalaryna ilikti. Ásirese Tólegenovtyń nomınasıasynda erekshe tartys bolaıyn dep tur, sebebi onda joǵaryda aıtylǵan Hamagýtı men 2023 jylǵy «Sandens» jáne Berlın kınofestıvalderiniń qatysýshysy Selın Son bar.
Otandyq úsh kartına da rejıserlerdiń debúttik jumystary bolyp tabylady, al olardyń ekeýi – «Aǵaıyndy» jáne «Baýyryna salý» Ulttyq kınony qoldaý memlekettik ortalyǵynyń kómegimen túsirilgen.
«Qash» fılmi qazaq dalasyndaǵy 30-shy jyldardaǵy asharshylyq kezindegi halyqtyń qıyn taǵdyry týraly baıandaıdy. Qabir qazýshy Isataı óz aýylyn qutqarý úshin qaýipti mısıaǵa barady, biraq jolda oǵan kezbe adam kezdesip, ony adastyrady. Aıta ketsek, Aısultan Seıitov jazda Shanhaı halyqaralyq kınofestıvalinde osy jumysy úshin «Úzdik rejıser» nomınasıasyn jeńip aldy.
«Aǵaıyndy» fılmin Maksım Akbarovtyń Golden Man Media kompanıasy shyǵarǵan. Ótken jyldyń qyrkúıeginde fılm Germanıadaǵy Oldenburg International Film Festival festıvalinde "Kıno rýhy" syılyǵyn jeńip alǵan bolatyn, al osy jyldyń sáýir aıynda Qazaqstannyń kınosynshylar qaýymdastyǵy bul kartınany 2022 jyldyń "Úzdik dramasy" dep tanydy. Sonymen qatar, "Aǵaıyndy" – Italıa, Reseı, Ózbekstan, Qytaı, Ispanıa jáne Bolgarıadaǵy halyqaralyq kınofestıvalderde 10 marapatqa ıe boldy.
«Baýyryna salý» fılmi sábı kezinen ájesiniń tárbıesinde bolǵan balanyń oqıǵasyn baıandaıdy. Týyndynyń tusaýy jaqynda ǵana Ispanıanyń San-Sebastán qalasynda ótken bedeldi kınofestıvalde kesildi, onda ol «Jańa rejıserler» baǵdarlamasynda kórsetildi.
Osy jyly 16 ret ótkiziletin bedeldi halyqaralyq Asia Pacific Screen Awards syılyǵynyń jeńimpazdary 3 qarashada Avstralıada jarıalanady. Ótken jyldardyń jeńimpazdarynyń qatarynda belgili qazaqstandyq rejıser Ádilhan Erjanov bar. APSA kınosyılyǵyn IýNESKO, Halyqaralyq kınoprodúserler qaýymdastyǵynyń federasıasy jáne Brısben qalalyq keńesi uıymdastyrady.