Depýtat Dáýlet Muqaev Májilistiń jalpy otyrysynda Ulttyq qordan 18 jasqa deıingi balalarǵa beriletin tólemge qatysty memlekettik organdar ókilderine suraq qoıdy, dep habarlaıdy Almaty-akshamy.kz Azattyq Ruhy-na silteme jasap.
«Mysaly, úıde aǵaıyndy balalar bolady. Qazir úlkeni 17 jasta delik. Osy Ulttyq qordan beriletin 3 500 dollardy 18 jylǵa eseptegende olar ár jyl saıyn shamamen 200 dollar ǵana alady. 200 dollar ne bilimge, ne úıge jetpeıdi. Osydan mynadaı suraq týyndaıdy: óziniń artynan erip kele jatqan baýyr, qaryndas, inilerine aqshany berý, aýdarý múmkindigi bar ma? Eger bolmasa, nege osy máseleni qarastyrmasqa?»,– dep surady depýtat Qarjy mınıstrligi ókilinen.
Óz kezeginde Qarjy vıse-mınıstri Dáýren Temirbekov depýtattyń suraǵyna jaýap berdi.
«Biz bul suraqty da talqyladyq. Eger bir otbasynda 18 jasqa tolmaǵan birneshe bala osy aqshany alatyn bolsa, olardyń quqyǵy Otbasy bankine aýdarylady. Otbasy bank depozıt arqyly mysaly, 3-4 balanyń depozıtin biriktirip, tıisti bir maqsatqa jumsaı alady. Maqsat bir – ol páter alý. Ondaı múmkindik qarastyrylǵan», - dep jaýap berdi vıse-mınıstr Májiliste.
Sonymen qatar, zańdy tanystyrǵan depýtat Únzıla Shapaq ta suraqtyń jaýabyn tolyqtyra ketti.
«Ol aqsha 10 jylǵa deıin BJZQ saqtalady. Sebebi, ol balalardyń bári bir jylda 18 jasqa tolmaıdy. Sol sebepti ózinen keıingi baýyrlarynyń jasy 18 jasqa tolǵan sátte ǵana ol aqsha qosylady. Osyǵan deıin qoldanylǵan Zeınetaqy qorynan aqsha alý mehanızmimen birdeı bolady. Bul zańda bar», - dedi depýtat.
Eske sala keteıik, búgin depýtattar «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń Ulttyq qorynan balalarǵa tólem jasaý máseleleri boıynsha ózgerister men tolyqtyrýlar engizý týraly» zańnyń jobasyn birinshi oqylymda maquldady.