Tártipsizdikke qatysýshylar muny bıliktiń sımvoly retinde basyp alǵylary keldi.
Qazaqstannyń bas prokýrory Berik Asylov Májiliste qańtar oqıǵasyna qatysty depýtattar saýalyna jaýap berdi, dep habarlaıdy Almaty-akshamy.kz QazAqparatqa silteme jasap.
Ótken aptada Májilis depýtaty Edil Jańbyrshın qańtar oqıǵasyna qatysty halyqtyń kókeıinde júrgen suraqtarǵa tıisti kúshtik qurylymdar men memlekettik organdardyń basshylary Májiliske kelip jaýap berýin talap etken bolatyn.
«Qańtar oqıǵasy búkil eldi dúr silkindirip, bárimizge úlken syn boldy. Búginde qolymyzda tolyq málimetter bar. Tergeý organdary oqıǵa hronologıasyn, negizgi uıymdastyrýshylardy anyqtady. Olardyń ishinde joǵary laýazymdy adamdar men uıymdasqan qylmystyq top músheleri de boldy. Barlyq qaza bolǵandardyń kim ekenin, olardyń qaıtys bolý sebepterin zerttedik. Qarý-jaraqty izdeý jalǵasýda. Qylmyskerlerdi jaýapqa tartýdamyz. Olardyń ishinde qyzmet múddesinde opasyzdyq jasap, azamattardyń qaýipsizdigin qamtamasyz etpegender de bar. Azaptaý boıynsha isterdi aıaqtap jatyrmyz», - dedi Berik Asylov Májilistiń búgingi otyrysynda.
Bas prokýratýra sol oqıǵalardy, olardyń saldaryn eske salý úshin qańtar oqıǵasy týraly beınerolık usyndy. Beınerolık málimetine sáıkes, qasiretti qańtarda elimiz boıynsha 5149 adam jaralanyp, 238 adam mert boldy. Olardyń 19-y – kúshtik qurylymdardyń qyzmetkerleri.
«Bul kúni qasıetti Táýelsizdigimizge orasan zor qater tóndi. Kóptegen iri qalalardyń ǵımarattary órtke oranyp, astań-kesteń boldy. Basty qundylyǵymyz – adam ómirine qaýip tóndi. Prezıdent qabyldaǵan batyl qımyldar nátıjesinde ǵana elge tóngen qaýip-qaterdiń beti qaıtty. Ol kúnderi barlyq zańnama buzyldy. Ókinishke oraı, qoǵamda beıbit mıtıń ótkizý mádenıeti qalyptaspaǵanyn moıyndaýymyz qajet. Adamdar jınalyp, kóshege shyqqanda, beıbit mıtıń týraly zańnyń barlyq normalary buzyldy», - dedi Bas prokýror.
Onyń aıtýynsha, uıymdastyrýshylar ákimdikti habardar etpeı, myńdaǵan adam jınaldy. WhatsApp pen Telegram arqyly tártipsizdikke qatysýshylardyń jınalýy men qozǵalysyn úılestirgen.
«Almatyda sanaýly saǵat ishinde bir toptyń ǵana ishinde qatysýshylar sany 5,5 myńǵa deıin kóbeıdi. Sol sıaqty Jambyl oblysynda qatardaǵy qatysýshylar sany 4 myńǵa deıin ósti. Keıin tobyr áseri oryn aldy. Adamdar polısıanyń zańdy talaptaryn oryndamaı, qarsylyq kórsetti, órtedi, tonady jáne kúsh qoldandy. Bul úshin Almatyda arnaıy kórshi oblystardan adamdar kele bastady.Keıin jaǵdaı ýshyǵa tústi. Tek bir kúni 5 qańtarda 8 óńirde ákimdikke shabýyl jasaldy. Tártipsizdikke qatysýshylar muny bıliktiń sımvoly retinde basyp alǵylary keldi. 5 qańtarǵa qaraǵan túni shabýyldaýshylar Almaty ákimdiginiń ǵımaratyna basyp kirdi. Bir saǵattan keıin, Shymkenttegi ákimdik ǵımaratyna shabýyl bastaldy. Sol kúni qylmyskerler Atyraý men Qyzylorda oblysy ákimdikteriniń ǵımaratyna shabýyl jasaı bastady. Shamamen sol ýaqytta Almatyda shabýyldaýshylar ákimdikti órtep, Prezıdent rezıdensıasyna qaraı baǵyt aldy», - dedi B. Asylov.