Qaraǵandy oblysynda spırttik ishimdikten bas tartqan aýyl bar.
Eldi mekende bir jyl boıy quqyqbuzýshylyq tirkelmegen. Bul bastamany aýyl ákimi men ýchaskelik polıseı aqsaqaldar alqasyna usynyp, turǵyndar túgel qoldaǵan, dep habarlaıdy Almaty-akshamy.kz.
Álibek Ospanov Tikenekti aýylynda 8 jyldan beri ýchaskelik polıseı bolyp jumys isteıdy. Jergilikti turǵyndardyń bárin tanıdy. Qaýipsizdik sharalaryn qashanda nazarda ustaýdy eskertip otyrady. Ol 1 jyl buryn ishimdikten bas tartýdy usynǵan. Bastamasyn búkil aýyl qup kórgen.
«Bizdiń aýylda polısıa bar, jıi-jıi tekseredi. Endi úlken basymyzben sheshesindeı adambyz, ol baladan sóz alyp, sógis alǵansha, osylaı ishimdiksiz, shylymsyz saýdamyzdy jasap jatyrmyz», - deıdi jeke kásipker Rysty Sársekeeva.
«Osy aýylda araq satylmaıdy. Araq ishetin adam joq. Sodan keıin aýylda ońdy, bári keńesip, aqyldasyp sheshemiz sharýanyń bárin», - deıdi aýyldyq aqsaqaldar keńesiniń tóraǵasy Ómir Búrkitbaev.
Esesine aýyl jastary bos ýaqytyn paıdaly iske jumsaıdy. Kóbi ónerge qumartyp ósip keledi. Dombyra úıirmesine keletinder kóbeıgen. Úlkender de jastardyń ár bir talpynysyn qoldap otyrady. Ýchaskelik polıseı bolsa, bul bastamasyn ózgelerge de nasısqattaýǵa nıetti.
«Jalpy, Tikenekti aýylynda 222 turǵyn turady. Qoǵamdyq keńes tóraǵasy, ákimimiz bar kezdesip, qylmystyq istiń aldyn alý, jastardy durys baǵytqa baǵyttaý úshin birigip jumys atqaryp otyrmyz», - deıdi ýchaskelik polısıa ınspektory Álibek Ospanov.
Tikenekti aýylynyń úlgili bastamasy kópke úlgi. Kúni keshe Qaraǵandy oblysyna kelgen İshki ister mınıstri Marat Ahmetjanov shalǵaıdaǵy aýyl ákimi Erlan Ospanovqa «Qoǵamdyq tártipti qamtamasyz etýge qosqan úlesi úshin» medalin tabystady. Al, aýyl turǵyndary bul marapat búkil aýylǵa kórsetilgen qurmet dep biledi.