QR Sý resýrstary jáne ırrıgasıa mınıstri Nurjan Nurjigitov Almaty oblysynda birqatar jobalardyń iske asyrylý barysymen jáne mańyzdy gıdrotehnıkalyq qurylystardyń jaı-kúıimen tanysty.
Aldymen Uıǵyr aýdanyndaǵy jergilikti sýarý jelilerin qalpyna keltirý jumystaryn baqylady,dep habarlaıdy Almaty-akshamy.kz mınıstrliktiń resmı saıtyna silteme jasap.
Mınıstr Almaty oblysynyń bólinýine baılanysty oblystyq ákimdikpen birlesip «Qazsýshar» RMK «Jetisý» fılıalynyń obektilerin D.Qonaev atyndaǵy Úlken Almaty kanalynyń balansyna nemese Almaty oblysynyń komýnaldyq menshigine berý týraly tapsyrma berdi. Sondaı-aq, «Jetisý» fılıalynyń balansyndaǵy Uıǵyr aýdanyndaǵy eki apatty sý qoımasyn rekonstrýksıalaý boıynsha jobalyq-smetalyq qujattama ázirleýdi tapsyrdy.
Odan ári Bartoǵaı sý qoımasynyń negizgi qurylystaryn – avtomatty sý jiberý, konýstyq bekitpeler men ysyrmalardy qarap shyqty. Bartoǵaı sý qoımasyna 1983 jyly paıdalanýǵa berilgennen beri tolyq rekonstrýksıa júrgizilmegen. Nurjan Nurjigitov nysannyń jobalaý-smetalyq qujattamasyn ázirleýdi jedeldetýdi tapsyrdy. JSQ ázirleý kezinde qazirgi ýaqytta «Qazgıprosýshar» ınstıtýty júrgizip jatqan kóp faktorly zertteý qorytyndylaryn eskerý qajet ekenin atap ótti.
Mınıstr Úlken Almaty kanalynyń bas ǵımaratyna bardy. Nurjan Nurjigitov magıstraldyń tozýyna baılanysty sýdy avtomatty esepke alý júıesin engize otyryp, kanaldy kezeń-kezeńimen rekonstrýksıalaýǵa kirisýdi tapsyrdy. Odan keıin Úlken Almaty kanalynyń apatty ýchaskelerin rekonstrýksıalaý josparymen tanysty.
«Nysan Almaty oblysy men Almaty qalasynyń azyq-túlik qaýipsizdigin qamtamasyz etý úshin óte mańyzdy. Sondyqtan qurylys-montajdaý jumystaryn bastaý úshin qajetti qujattardy alýdy jedeldetý jáne is júzinde olardy oryndaýǵa kirisý qajet»,- dedi Nurjan Nurjigitov.
Jumys sapary aıasynda mınıstr Nura toptyq sý qubyrynyń «Alataý» fılıaly nysandarynyń qyzmetimen tanysty. Tıimdi basqarýǵa qol jetkizý úshin «Alataý» fılıalynyń toptyq sý qubyrlaryn jergilikti atqarýshy organdardyń balansyna berý týraly sheshim qabyldandy.
Nurjan Nurjigitov Almaty oblysyna jumys saparynyń sońynda «Qazsýshar» RMK D.Qonaev atyndaǵy «Úlken Almaty kanaly» fılıalynyń ákimshilik basqarmasyna bardy. Fılıal ujymymen keńes ótkizip, jańadan qurylǵan Sý jáne ırrıgasıa mınıstrliginiń mindetteri men negizgi baǵyttarymen tanystyrdy.