Nur Otan partıasynyń Almaty qalalyq fılıalynyń tóraǵasy, megapolıs ákimi Baqytjan Saǵyntaev partıanyń qoǵamdyq qabyldaýynda azamattardy qabyldady, dep habarlaıdy Almaty-akshamy.kz
Megapolıs basshysy E. Nókerbekovaǵa sýrdoaýdarmashy qyzmetin alýǵa jáne múmkindigi shekteýli jandardy oqytýmen aınalysatyn «Krasıvyı mır» mektebi úshin aqparattyq jaryqtandyrý qyzmetine qoldaý kórsetýdi tapsyrdy. Sondaı-aq, Almaty qalasynyń polısıa departamenti mektep janynda nashar estıtin azamattar úshin arnaıy jol belgilerin ornatady.
Káribaı aqyn kóshesine kúrdeli jóndeý júrgizýge qatysty Q.Ábdimoldaev turǵyndardyń ujymdyq ótinishin jetkizdi. Onyń aıtýynsha, turǵyn úıdiń janynda jaıaý júrginshiler joldary men jaryqtandyrý, sondaı-aq ınjenerlik júıelerdi rekonstrýksıalaý qajet. Fılıal tóraǵasy jergilikti atqarýshy organdarmen birlesip tıisti sheshim qabyldaýdy tapsyrdy.
D. Satylǵanova "Terekti" shaǵynaýdanynyń Taýsoǵar kóshesindegi jol jabynyn qalpyna keltirý týraly ótinishin jetkizdi. Buryn osy ýchaskede ınjenerlik jeliler júrgizilgen. Alataý aýdanynyń ákimine qalalyq mobıldilik basqarmasymen birlesip atalǵan máseleni sheshý tapsyryldy.
Volnaıa kóshesi, 5 úı turǵyndarynyń 1937 jyly salynǵan qańqaly-qamysty úıdi buzý nemese úıdi apatty – eski úı qurylystary tizimine engizý jónindegi ótinishteri jiti zerdelenetin bolady.
"Taýsamaly" shaǵynaýdany Janjigit kóshesi turǵyndarynyń atynan júgingen V.Merzlákovtyń saýaly oń sheshimin tapty. «Taý Janjigit 4» tutyný kooperatıviniń qosylýy Almaty qalasynyń komýnaldyq qyzmetteri qyzmet kórsetetin kósheler tizimine qosylýyna yqpal etti.