Baqytjan Saǵyntaev Almatynyń tynys-tirshiligin tolyq qalpyna keltirý máseleleri jóninde jumys keńesin ótkizdi, dep habarlaıdy Almaty-akshamy.kz
Almaty qalasynyń ákimi Baqytjan Saǵyntaev megapolıske terorıstik shabýyldan keıin qalanyń tynys-tirshiligin qalpyna keltirý máseleleri jóninde jumys keńesin ótkizdi.
Keńeske qala ákiminiń orynbasarlary, aýdan ákimderi, negizgi basqarmalardyń basshylary qatysty. Basshylardyń júrgizilip jatqan jumystarǵa jáne terrıster men bandıttik toptardan tazartylǵan shaǵynaýdarǵa kelgen shyǵynǵa qatysty esepteri tyńdaldy.
Ákim orynbasary S.Qusaıynovqa bandıtterdiń is-áreketi saldarynan zardap shekken aýmaqtardy tazalaýdy bastaý, qaýipsizdik talaptary men tótenshe jaǵdaı rejımi talaptaryn saqtaý tapsyryldy.
Ákim orynbasary M.Ázerbaev jalpyqalalyq energıa, sý, jylý jáne gazben qamtamasyz etý júıesiniń jaı-kúıi jaıynda baıandady. Lańkestik shabýyl bastalǵan sátten beri qalada jalpy alǵanda tynys-tirshilikti qamtamasyz etetin júıelerde irkilis bolmaǵandyǵy atalyp ótildi. Týyndaǵan máseleler jedel sheshilip, turaqty baqylaýda boldy.
Ákim orynbasary M.Qıqymovqa qalalyqtardy azyq-túlikpen qamtamasyz etýge qatysty ahýaldy jáne qalanyń azyq-túlik qaýipsizdigin turaqtandyrý, sonymen qatar azyq-túlik jetkizýdiń logıstıkalyq júıelerin qamtamasyz etý júkteldi.
Sondaı-aq ákim B.Saǵyntaev, ásirese, úılerdiń janyndaǵy dúkenderdi azyq-túlikpen qamtamasyz etý, qalalyq dárihanalardyń úzdiksiz jumysyn uıymdastyrý máselelerin erekshe baqylaýda ustaýdy tapsyrdy.
Kesheden beri qala ákimi B.Saǵyntaevtyń tapsyrmasymen «Magnum» jelisiniń 2 sýpermarketi ashylǵany belgili. Taıaý ýaqytta iri saýda jelileriniń birqatar dúkenderi men kóterme saýda oryndary ashylatyn bolady.
Budan bólek, keńeste densaýlyq saqtaý jáne qalalyq utqyrlyq basqarmasy basshylarynyń esebi tyńdaldy. Olar aǵymdaǵy jaǵdaı jáne ony turaqtandyrý boıynsha qabyldanyp jatqan sharalar týraly baıandady.
Almatyda terorıstik shabýyldyń nátıjesinen kelgen shyǵyndy aldyn ala baǵalaý bastaldy.
Esterińizge sala keteıik, osy jyldyń 5 qańtarynda Almaty qalasynda terorıstik shabýyl jasaldy. Sonyń nátıjesinde sodyrlar ákimshilik ǵımaratty basyp alyp, dúkenderdi, shaǵyn bıznes sýbektilerin qıratty jáne tonady.
Qala turǵyndarynyń jeke múlikterine de aıtarlyqtaı shyǵyn keltirildi. Sol kúni Memleket basshysy Qasym-Jomart Toqaev lańkesterge qarsy operasıanyń bastalǵanyn jarıalady.