QR Prezıdenti janyndaǵy Ortalyq komýnıkasıalar qyzmetinde ótken baspasóz konferensıasynda B. Saǵyntaev Almaty ekologıasyn jaqsartý úshin qabyldanyp jatqan sharalar týraly aıtyp berdi.
Eń basty mindettiń biri - JEO-2-ni gazǵa kóshirý jónindegi kóp jyldyq problemany sheshý boldy. Qurylys jumystary 2022 jyldyń naýryz-sáýir aılarynda bastalady, dep habarlaıdy Almaty-akshamy.kz
Stansıanyń birinshi blogyn gaz otynyna qosý 2023 jyldyń sońyna josparlanyp otyr. Jańa stansıanyń jobasy ornatylǵan 600 MVt-qa deıin elektr jáne 957 Gkal/saǵ jylý qýatyn qarastyrady.
Elektr stansıasy ekologıalyq taza otyn – tabıǵı gazben jylytylady. Ol jylý men elektr energıasyn birlesip óndirý – kogenerasıa qaǵıdatyn paıdalana otyryp, zamanaýı bý-gaz tehnologıalary boıynsha salynady.
Stansıanyń 200 MVt úsh blogy paıdalanýǵa berilgende, jańa jabdyq kezeń-kezeńimen qoldanystaǵylardy almastyratyn bolady. Elektr energıasy men jylý óndirý prosesi toqtamaıdy.Modernızasıadan soń qala atmosferasyna JEO-2 shyǵaryndylary 15 eseden astam qysqarady.
Qoǵamdyq kólik salasynda elektr qýatymen jáne gaz otynymen júretin avtobýstardy satyp alý júrgizilýde. Elektrotaksı qyzmeti damýda.
Sonymen qatar, qala turǵyndaryn megapolıstiń túrli bólikterinde aýa sapasy týraly aqparattandyrý jobasy iske qosyldy. Aqparat qalanyń 49 LED-ekranyndaǵy 41 dachıkten kelip túsedi, sondaı-aq «Almaty» telearnasynda kórsetiledi. Sonymen qatar, bıyl aýa monıtorıńi boıynsha 60 dachık ornatý jáne «Sergek» júıeleri men shyǵaryndylardy tirkeý jáne qala boıynsha qozǵalysty baqylaý boıynsha PD-niń bazasyn ıntegrasıalaý josparlanýda.
Jasyl qordy damytý boıynsha jumystar júrgizilýde. Jalpy, qalada 2,6 mln aǵash bar, onyń 23%-y eski. «Jasyl Almaty» baǵdarlamasy aıasynda 530 myńnan astam aǵash otyrǵyzyldy. Bıyl 190 myń aǵash otyrǵyzylady, búginde onyń 115 myńǵa jýyǵy otyrǵyzyldy.
Qalaǵa kire beriste 15 ekopost ornatylǵan, taǵy 4-eýi aǵymdaǵy jyldyń sońyna deıin ornatylady.
Barlyq beketter ólsheýge arnalǵan jabdyqtarmen, beınebaqylaý kameralarymen jabdyqtalǵan.
Aǵymdaǵy jyldyń 20 naýryzynan bastap 140 405 ólshem oryndaldy, onyń ishinde 21 913-te zıandy zattardyń artýy tirkelgen.
Kelesi jyldan bastap 3 jyljymaly ekologıalyq beket pen 1 zerthana iske qosylady.
Qazirgi ýaqytta ekologıalyq normalarǵa sáıkes kelmeıtin kólik quraldaryn anyqtaý boıynsha reıd júrgizilýde. 2 550 kólik tekserildi, paıdalanylǵan gazdardaǵy zıandy zattardyń asyp ketýi 519 avtokólikte anyqtaldy. Tekserilgen avtokóliktiń jalpy sanynyń 23%-y ekologıalyq normalarǵa sáıkes kelmeıdi.
EQDB «Jasyl qalalar» baǵdarlamasy aıasynda Ekologıa jáne qala damýy máselelerin sheshý úshin «Jasyl qala» josparyn ázirleýde.
Sondaı-aq, qorshaǵan ortany jaqsartýdyń turaqty tetikterin qurý úshin «Big Apple» jobasy, aglomerasıanyń TQQ basqarý baǵdarlamasy, Almatynyń jasyl beldeýin damytýdyń 10 jyldyq jospary, aglomerasıa atmosferasynyń dınamıkalyq modelin qurý jáne onyń jumys isteýin qoldaý úshin MJÁ, jańartylatyn energıa kózderin damytý baǵdarlamasy, elektr kóligi úshin zarádtaý ınfraqurylymyn qurý jáne qoldaý úshin MJÁ jáne t. b. ázirlenýde.