Keı elde bankrot bolǵan adamdar shetelge shyǵarylmaıdy.
Qarjy vıse-mınıstri Erjan Birjanovtyń málimdeýinshe, bankrot dep tanylǵan Qazaqstan azamattaryna shekaradan shyǵýǵa eshqandaı shekteý qoıylmaıdy, dep habarlaıdy Almaty-akshamy.kz
Birqatar elde bankrot bolǵan adamdarǵa shetelge shyǵýǵa tyıym salynady, biraq Qazaqstan zańnamasynda mundaı norma joq.
Tek sot bankrottyǵy boıynsha prosedýra júrgiziletin kezeńde ǵana el aýmaǵynan shyǵýǵa bolmaıdy.
«Bizdiń zańnamada tek qana ekinshi tásil (sot bankrottyǵy) boıynsha sotqa júgingen kezde, prosedýra alty aı qaralatyn kezde ǵana shekteý qoıylady. Sebebi prosedýra sozylyp ketýi múmkin. Azamat sotqa júginip, shet elge shyǵyp ketse, prosedýra toqtap qalady. Sondyqtan naqty sheshim qabyldanǵa deıin shekteý qoıylady», - dep túsindirdi Birjanov.
Qaryzyn tóleı almaı júrgen qazaqstandyqtar 3 túrli rásim boıynsha kredıtinen qutyla alady.
Birinshi rásim – sottan tys bankrottyq. Ony tek bankter, mıkroqarjy uıymdary jáne kolektorlyq agenttikter aldyndaǵy qaryzdar boıynsha qoldanýǵa bolady.
Myna sharttar saqtalýy qajet:
borysh 5,5 mln teńgeden (1600 AEK) aspaıdy;
kredıt 12 aı boıy ótelmegen bolýy kerek;
menshiginde tirkelgen múlik, onyń ishinde ortaq menshiktegi múlik bolmaǵan jaǵdaıda;
bankpen retteý júrgizilgennen keıin jasalady.
Bul rette ataýly áleýmettik kómek alýshylar úshin 6 aı ishinde jáne bereshegi 5 jyldan artyq ótelmegen azamattar úshin erekshe jaǵdaılar kózdelgen.
Ekinshi rásim – sot bankrottyǵy. Sot bankrottyǵynyń maqsaty – bankrottyń múliktik massasy esebinen kredıtorlardyń talaptaryn barynsha qanaǵattandyrý. Bul rásimdi qarjy basqarýshylary júzege asyrady, olardyń quramyna jumys istep turǵan ákimshiler, kásibı býhgalterler, zań keńesshileri men aýdıtorlar kiredi.
Úshinshi rásim, bul – tólem qabilettiligin qalpyna keltirý, onda sot arqyly boryshty bólip-bólip tóleý (5 jylǵa deıin) múmkindigi kózdeledi. Onyń artyqshylyǵy – azamat «bankrot» dep sanalmaıdy. Demek bankrot úshin kózdelgen saldarlar oǵan qoldanylmaıdy.