Almaty qalasyndaǵy balalar kolonıasynda 1 maýsym - Halyqaralyq balalardy qorǵaý kúni jyl saıyn saltanatpen atalyp ótiletin jarqyn mereke.
Bul - elimizdegi aıaǵyn jaza basyp, sotty bolǵan jasóspirimder tárbıelenetin jalǵyz mekeme. Qazirgi kúni 49 bala jazasyn óteýde. Solardyń ishinde asa aýyr qylmys jasaǵany - 34, aýyr qylmys - 14, aýyrlyǵy tómen qylmys - 1.
Kolonıa ókilderi uıymdastyrǵan merekege, ıaǵnı “Ashyq esik kúnine” jerdiń shalǵaılyǵyna qaramaı ár taraptan balalaryn qushaǵyna alýǵa alyp-ushyp jetken ata-analar men jaqyndary qýanyshty búgin.
Saltanatty is-sharaǵa Almaty qalasy Jetisý aýdany ákiminiń orynbasarlary qatysyp, sóz sóıledi. Almaty qalasy Mádenıet basqarmasyna qarasty «Almaty áýenderiniń» ónerpazdary án-jyrdan shashý shashty.
Jambyl atyndaǵy balalar men jasóspirimder kitaphanasynyń mádenı is-shara uıymdastyrý bóliminiń qyzmetkerleri de atsalysty. Dombyrashy Ahmadıev Aıbyn, ánshi Ahan Erkebulan da balalar men ata-analarǵa merekelik kóńil kúı syılady.
“Biz balalar men olardyń ata-analary úshin jylda osyndaı mereke uıymdastyramyz. Úıin saǵynyp júrgen balalar da bir jasap qalady. Biz olardy qandaı jaǵdaıda da adamgershilik, meıirim, qaıyrym syndy adamı qasıetterden aıyrylmaýǵa shaqyryp otyramyz”, - deıdi mekeme bastyǵy ádilet podpolkovnıgi Mıras Tolýbaev.
“Ashyq esik kúni” kolonıa ujymy Almaty Ortalyq meshiti “Zeket” qaıyrymdylyq qorynyń qoldaýymen jazaly jasóspirimderge merkelik dastarhan jaıdy.