Ár ótinish 24/7 formatynda shuǵyl qaralady.
Suraqtardyń basym bóligi otbasyndaǵy janjalǵa, balalar men muǵalimder arasyndaǵy qarym-qatynasqa, kóp balaly otbasylarǵa beriletin járdemaqylarǵa, býllıng jáne jazǵy demalysty uıymdastyrýǵa qatysty bolǵan, dep habarlaıdy Almaty-akshamy.kz mınıstrliktiń baspasóz qyzmetine silteme jasap.
Mysaly, telegram-chatqa ákesinen turmystyq zorlyq-zombylyq kórgen balanyń anasy shaǵymdanǵan. Áıeldiń ótinishimen Almaty oblysynda turatyn otbasyna qamqorshylyq organdary, aýdan ákimdiginiń qyzmetkerleri jáne polısıa qyzmetkerleri shuǵyl túrde jóneltilip, jaǵdaı baqylaýǵa alyndy.
«Biz ótinish berýshilerdiń suraqtaryna múmkindiginshe jyldam jaýap berýge tyrysamyz. Túsken ótinishter boıynsha ata-analar men balalarǵa quqyqtyq jáne psıhologıalyq kómek jetispeıtinin baıqaýǵa bolady. Árbir ótinishti pysyqtap, qajetti kómek kórsetip, barlyq mán-jaı anyqtalyp, jaǵdaı tolyq sheshilgenshe ár jaǵdaıdy erekshe baqylaýda ustaımyz», - dedi Balalardyń quqyqtaryn qorǵaý komıteti tóraǵasynyń orynbasary Elına Paýlı.
Ár ótinish 24/7 formatynda shuǵyl qaralady. Telegram-chat balalardyń quqyǵyn buzý, kámeletke tolmaǵandarǵa qatysty zorlyq-zombylyq nemese qatygezdik kórsetý jaǵdaılaryn jyldam anyqtaýǵa jáne sheshýge kómektesedi, - deıdi Oqý-aǵartý mınıstrliginiń ókili.
Telegram-chat arqyly oqýshylar arasyndaǵy býllıng faktisi de anyqtaldy. Máselen, Bala Qorgau telegram-botyna qysqa boıy men erekshe kelbeti úshin synyptastarynyń mazaǵyna qalǵan oqýshydan hat tústi. Mamandar balamen jáne onyń synyptastarymen áńgimelesip, janjal sheshildi.
Sondaı-aq oqýshylar arasyndaǵy aqsha talap etý jaǵdaılaryna qatysty ótinishter de túsedi. Mysaly, telegram-chatqa oblystardyń birinen 11-synyp oqýshysy habarlasty. Komıtet ókilderi oqýshylar arasynda qajetti jumystardy júrgizip, pedagogterdiń nazaryn osy máselege aýdardy. Nátıjesinde bul másele sheshildi.
«Balalarǵa psıhologıalyq qoldaý qajet. Kóptegen ata-ana jumystan qoly bosamaıdy jáne balalaryna kóp ýaqyt bóle bermeıdi. Sol sebepti ata-analardan balalaryna kóńil bólip, áńgimelesýin, olarmen jaqyn bolýyn suraımyz. Osylaısha qaıǵyly jaǵdaılardy boldyrmaýǵa bolady», - dep túsindirdi Elına Paýlı.
Balalardyń quqyqtaryn qorǵaý komıteti ótinish berýshiniń barlyǵyna quqyqtyq jáne psıhologıalyq qoldaý kórsetedi. Bul baǵyttaǵy jumystar jalǵasyn tabady.