Zańnamaǵa tıisti túzetýler memlekettik organdardyń qaraýynda.
QR Premer-mınıstri Asqar Mamın Úkimettiń Sıfrlyq keńsesinde ortalyq memlekettik organdar basshylarynyń jáne óńirler ákimderiniń qatysýymen áleýmettik mańyzy bar azyq-túlik taýarlaryna (ÁMAT) jáne janar-jaǵarmaı materıaldaryna (JJM) baǵany retteý máselesi jóninde keńes ótkizdi, dep habarlaıdy Almaty-akshamy.kz Úkimettiń baspasóz qyzmetine silteme jasap.
Qazirgi jaǵdaı men júrgizilip jatqan jumys týraly saýda jáne ıntegrasıa mınıstri Baqyt Sultanov, aýyl sharýashylyǵy mınıstri Erbol Qarashókeev, ındýstrıa jáne ınfraqurylymdyq damý mınıstri Beıbit Atamqulov, energetıka vıse-mınıstri Áset Maǵaýov, «QazMunaıGaz» UK» AQ basqarma tóraǵasy Alık Aıdarbaev, Básekelestikti qorǵaý jáne damytý agenttiginiń tóraǵasy Serik Jumanǵarın, Nur-Sultan qalasynyń ákimi Altaı Kólginov, Aqtóbe oblysynyń ákimi Ońdasyn Orazalın, Qyzylorda oblysynyń ákimi Gúlshara Ábdiqalyqova, Qaraǵandy oblysy Jeńis Qasymbek jáne t.b. baıandady. Ótken aptada áleýmettik mańyzy bar azyq-túlik taýarlary baǵasynyń ósýi 0,2% qurady. Buǵan jumyrtqanyń 2,7%-ǵa qymbattaýy áser etti. Jumyrtqa baǵasynyń eń kóp ósýi Mańǵystaý (21,8%), Shyǵys Qazaqstan (16,6%) jáne Aqtóbe (12,1%) oblystarynda tirkeldi. «Aınalym sqemasy» sheńberinde óńirlerde 167,7 myń tonna áleýmettik mańyzy bar taýarlar satyp alyndy. Eń kóp jasalǵany nan (41 myń tonna), kartop, un jáne qant (71,6 myń tonna) qory boldy. Kúnbaǵys maıyn, qaraqumyq, sıyr eti men qyryqqabatty satyp alýǵa qarjylandyrý ulǵaıtylatyn bolady. Nan baǵasynyń ósýine jol bermeý maqsatynda bıylǵy jyldyń sońyna deıin óńirlik turaqtandyrý qorlarynan ıntervensıalar júzege asyrylady, al keıinnen «Azyq-túlik kelisim shart korporasıasy» UK» AQ-dan arzandatylǵan bıdaı satyp alý arqyly júzege asady. Zańnamaǵa tıisti túzetýler memlekettik organdardyń qaraýynda. İshki naryqty dızel otynymen qamtamasyz etý úshin avtomobıl kóligimen munaı ónimderin tasymaldaýǵa tyıym salyndy, a.j. sáýir aıynan bastap dızel otynynyń eksporty toqtatyldy, Atyraý MÓZ-inde josparly jóndeý jumystary 2022 jylǵa aýystyryldy, a. j. 1 qyrkúıekten 5 qazanǵa deıin RF-dan 55,9 myń tonna dızel otyny ımporttaldy jáne basqa da sharalar qabyldandy. Pavlodar munaı-hımıa zaýytynyń munaıdy bastapqy óńdeý keshenin jóndeý merzimin 1 qazannan 9 qazanǵa aýystyrý qosymsha 30 myń tonna dızel otynyn óndirýge múmkindik berdi. Jóndeý jumystaryn aıaqtaý aǵymdaǵy jyldyń 4 qarashasyna josparlanǵan. Jyl basynan beri elimizde 78 mln tonna kómir óndirildi. Komýnaldyq-turmystyq qajettilikter men turǵyndar úshin kómir ónimderiniń qajettilik josparyna sáıkes 2021-2022 jyldarǵa arnalǵan tutyný kólemi shamamen 9,2 mln tonnaǵa jýyqty quraıdy, onyń ishinde 2,8 mln tonnasy – komýnaldyq-turmystyq sektorda, 6,4 mln tonnasyn turǵyndar tutynady. Búginde ákimdikter 7,5 mln tonna kómir ákeldi, bul komýnaldyq-turmystyq sektor qajettiliginiń 93,1%-yn jáne halyqtyń qajettiliginiń 76%-yn qamtamasyz etedi. Ótken aptada Básekelestikti qorǵaý jáne damytý agenttigi Shymkent qalasynda, Aqmola, Soltústik Qazaqstan, Almaty, Pavlodar, Aqtóbe jáne Jambyl oblystarynda 87 taýar pozısıasy boıynsha saýda ústemesin kóterýdiń 16 faktisin anyqtady. Monopolıaǵa qarsy baqylaý aıasynda dızel otyny naryǵynda baǵany tómendetý týraly 19 habarlama shyǵaryldy. Munaı bazalaryn, kóterme jáne bólshek saýda jetkizýshilerin dızel otynyn ótkizýdi shekteýdiń negizdiligi jáne ony QR aýmaǵynan tys jerge shyǵarý múmkindigi turǵysynan tekserý bastaldy. Premer-mınıstr óńirlerdiń ákimderine turaqtandyrý qorlaryn azyq-túlikpen tolyqtyrý jáne «aınalym» sqemasyna qarajat bólý jónindegi jumysty jandandyrýdy, saýda sýbektileriniń saýda ústemesin buzýy faktileri boıynsha dereý sharalar qabyldaýdy, halyqtyń jáne komýnaldyq-turmystyq sektordyń qajettilikteri úshin úzdiksiz kómir jetkizýdi qamtamasyz etýdi tapsyrdy. Úkimet basshysy áleýmettik mańyzy bar azyq-túlik ónimderiniń baǵasyn ustap turý boıynsha júıeli jumys júrgizýdiń jáne ınflásıaǵa qarsy den qoıý sharalarynyń keshenin tıimdi iske asyrýdyń mańyzdylyǵyn atap ótti.