Jospardy Úkimet maquldady.
QR Ulttyq qorynan 2022-2024 jyldarǵa kepildendirilgen transfert aıasynda azyq-túlik qaýipsizdigin qamtamasyz etýge 200 mlrd teńgeden astam qarjy bólinedi, dep habarlaıdy Almaty-akshamy.kz QazAqparatqa silteme jasap.
Bul jóninde QR Qarjy mınıstriniń orynbasary Tatána Saveleva Májilistegi jańa zań jobasynyń tanystyrylymynda aıtty.
«Taǵy bir baǵyt – azyq-túlik qaýipsizdigin qamtamasyz etý jospary aıasyndaǵy is-sharalar. Jospardy Úkimet maquldady, ol sapaly, qaýipsiz taýarlardyń naqty ekonomıkalyq qoljetimdiligin qamtamasyz etýge baǵyttalǵan. Ony júzege asyrýǵa úsh baǵytqa 238 mlrd teńge bólinedi. Agroónerkásip keshenin sýbsıdıalaýǵa, onyń ishinde áleýmettik nan men jumyrtqany sýbsıdıalaýǵa 139 mlrd teńge qarastyrylǵan. Kóktemgi egis jáne egin jınaý jumystaryna jeńildetilgen nesıe berý kólemin 70-ten 140 mlrd teńgege deıin arttyrý kózdelip otyr», - dedi vıse-mınıstr.
Sondaı-aq, ol elde jemshóp qoryn qalyptastyrý úshin 20 mlrd teńge bólinetinin aıtty.
«Byltyrǵy tájirıbe kórsetkendeı, jemshóp qoryn qalyptastyrý mańyzdy. Azyq-túlik kelisim shart korporasıasy osy maqsatpen 200 myń tonna kóleminde astyq satyp alýdy josparlap otyr. Bul qor keıin qus, mal sharýashylyǵy kásiporyndaryn qurǵaqshylyq sıaqty shetin jaǵdaılardan, ishki naryqtaǵy azyq-túlik baǵasynyń kúrt tapshylyǵynan saqtaıdy», - dedi Tatána Saveleva.
Aıta keteıik, buǵan deıin QR Ulttyq ekonomıka mınıstri Álibek Qýantyrov jýrnalıserge Ulttyq qordan kepildendirilgen transfertti naqtylaý ne úshin qajet bolǵanyn túsindirgen bolatyn.