«Aýylda densaýlyq saqtaýdy jańǵyrtý» ulttyq jobasyn iske asyrý máselesi Úkimette Premer-Mınıstr Oljas Bektenovtiń tóraǵalyǵymen ótken otyrysta qaraldy.
Prezıdent Qasym-Jomart Toqaevtyń aýyldaǵy medısınalyq kómektiń qoljetimdiligin arttyrý jáne sapasyn jaqsartý boıynsha qoıǵan mindetteriniń oryndalýy týraly Densaýlyq saqtaý mınıstri Aqmaral Álnazarova baıandady, dep habarlaıdy almaty-akshamy.kz.
Ótken jyldyń qorytyndysy boıynsha Qazaqstanda 99 alǵashqy medısınalyq-sanıtarlyq kómek nysany salyndy.
Bıylǵa 556 medısınalyq jáne feldsherlik pýnktter, sondaı-aq dárigerlik ambýlatorıalar salý kózdelgen. Qazirgi ýaqytta qurylys-montaj jumystary 322 nysanda bastalyp, 3 nysanda aıaqtaldy, dep habarlady Aqmaral Álnazarova
Bul rette Densaýlyq saqtaý mınıstrligi Ónerkásip jáne qurylys mınıstrligimen birlesip, memlekettik saraptama qorytyndysynyń negizinde jobalaý-smetalyq qujattamany ázirlep, baılanystyrýdy tolyq aıaqtady. Jalpy, Ulttyq jobada iske asyrýdyń barlyq kezeńinde 655 alǵashqy MSAK nysanynyń qurylysy qarastyrylǵan. Sondaı-aq 32 ortalyq aýdandyq aýrýhanany jańǵyrtý kózdelýde. Qazirgi ýaqytta 10 nysanda tıisti jumystar júrgizilip jatyr, 2 medısınalyq mekemege kúrdeli jóndeý jumystary aıaqtaldy.
2023-2024 jyldar kezeńinde 152 densaýlyq saqtaý obektisinde 656 medısına qyzmetkeri jumysqa ornalastyryldy. Bul rette Ulttyq joba sheńberinde kadrlarǵa jalpy qajettilik 1 100 medısına qyzmetkerin qurady. Úkimet otyrysy barysynda Qaraǵandy, Jetisý jáne Almaty oblystary ákimderiniń baıandamalary tyńdaldy.
Kesteden artta qalý jáne aýyldyq aýmaqtarda MSAK obektilerin salý boıynsha jumysty kúsheıtý, jandandyrý qajettigi atap ótildi. Máselen, jyl sońyna deıin densaýlyq saqtaý uıymdarynyń eń kóp sany Qaraǵandy oblysynda salynýy tıis. Bul rette iske asyrýǵa josparlanǵan 78 nysannyń tek úshten birinde ǵana jumys bastalǵan. Jetisý oblysynda obektilerdiń tek 75%-y boıynsha qurylys-montajdaý jumysyna shart jasaldy.
Premer-Mınıstr osy jyly aıaqtalatyn Ulttyq jobany iske asyrý Úkimettiń basym mindetteriniń biri ekenin atap ótti.
Prezıdenttiń aýyldyq aýmaqtarda medısınalyq uıymdar salý jónindegi tapsyrmasyn oryndaý máselesi erterek – osy jyldyń aqpan aıynda qaraldy. Ótken kezeńde úlken jumys júrgizildi, dep atap ótti Oljas Bektenov — barlyq jobalardyń jobalyq-smetalyq qujattamasyna memlekettik saraptama aıaqtaldy, merdigerler anyqtaldy, jumystar bastaldy.
«Ákimdikter barlyq nysannyń qurylys jumystaryn ýaqtyly ári sapaly júrgizý úshin kúndelikti baqylaýdy kúsheıtýi kerek. Qaraǵandy, Aqtóbe, Pavlodar, Batys Qazaqstan, Jetisý jáne Almaty oblystary ákimderiniń nazaryn osyǵan aýdarǵym keledi. Qurylys maýsymy, ásirese soltústik óńirler úshin tez aıaqtalatynyn eskerý qajet. Barlyq obektiler belgilengen merzimde paıdalanýǵa berilýge tıis. Bul rette qurylys jumystarynyń normatıvtik talaptarynyń saqtalýyn da qamtamasyz etý kerek», — dedi Oljas Bektenov.
Premer-Mınıstr sondaı-aq kópsalaly aýdandyq aýrýhanalardy jóndeý jumystaryn jalǵastyrý jáne densaýlyq saqtaý uıymdaryn sapaly jaraqtandyrý úshin qajetti medısınalyq jabdyqtardyń tizbesin qalyptastyrý qajettigin atap ótti.
Úkimet basshysy Ulttyq jobany iske asyrýǵa 60,3 mlrd teńge bólingenin, onyń 21 mlrd teńgeden astamy óńirlerge berilgenin atap ótti. Qalǵan obektilerdi qarjylandyrý qosymsha pysyqtalýda — osy máseleni sheshýdi jedeldetý úshin beıindi vedomstvolarǵa tıisti tapsyrma berildi. Densaýlyq saqtaý mınıstrliginiń aldyna obektilerge olar aıaqtalǵanǵa deıin turaqty túrde baryp, qurylys barysyna monıtorıń júrgizý mindeti qoıyldy.