Basty talap - memlekettik tildi bilýi tıis.
Nur Otan janyndaǵy qoǵamdyq saıasat ınstıtýty osy saılaýǵa baılanysty el arasynda saýalnama júrgizgen. Osy arqyly mamandar aýyl ákimi bolýǵa laıyq adamnyń portretin jasaýǵa tyrysqan, dep habarlaıdy Almaty-akshamy.kz Almaty.tv caıtyna silteme jasap.
«Biz eldiń pikirin terý arqyly aýyl ákimi bolýǵa laıyq adamnyń portretin jasaýǵa tyrystyq. Bolashaq ákimge qoıylatyn mindetti talaptar retinde aýyldyq respondentter joǵary biliminiń jáne basshy laýazymdardaǵy jumys ótiliniń bolýyn, sondaı-aq memlekettik tildi bilýin basty talap retinde qoıady»,– dedi Nur Otan partıasynyń qoǵamdyq saıasat ınstıtýtynyń dırektory Mádına Nurǵalıeva.
Saýalnamaǵa 3 myń aýyl turǵyny qatysqan bolatyn. Sonymen qatar, Madına Nurǵalıeva aýyl turǵyndaryn barynsha oılanyp daýys berýge shaqyrdy.
«Turǵyndarǵa aýyldyń naqty máselelerin sheshe alatyn, jaýapkershiligi mol, bilimdi jáne saýatty adamdy tańdaý durys ekenin túsiný kerek»,– dedi sarapshy.
Buǵan deıin aıtylǵandaı, 25 shildede 730 aýyldyń ákimi saılaý arqyly qyzmetke keledi. Al jyl sońyna deıin taǵy 45 aýyl ákimi saılanýy tıis.
«Aýyl ákimderin saılaý – saıası jańǵyrýdyń jańa kezeńi. Osy kezeńnen bastap bizde «aýyl ákimi» deıtin taǵy bir saılanbaly laýazym paıda boldy. Osy ýaqytqa deıin Qazaqstanda bir ǵana saılanbaly laýazym bolǵan edi. Ol – QR Prezıdenti. Aldaǵy saılaýdyń ereksheligi – azamattardyń aýyldyq aýmaqtardy damytýǵa qatysýyn keńeıtý. Endi jergilikti mańyzy bar máselelerdi tikeleı aýyl turǵyndary sheshe alady. Sondaı-aq, saıası partıalar úshin de, belsendi azamattar úshin de saıası básekelestikti damytýǵa jaqsy múmkindik týyndap tur. Iaǵnı, ózin-ózi usyný tájirıbesi derbes azamattarǵa baq synaýǵa jol ashady», – dedi Mádına Nurǵalıeva.
Instıtýt dırektory aldaǵy saılaýdyń taǵy bir mańyzdy elementi retinde búletenderde «Bárine qarsymyn» degen baǵannyń bolýyn aıryqsha atady. Onyń aıtýynsha, bul - demokratıalyq tájirıbeniń damýynan týyndaǵan talap. "Saılaý naýqany qyzyqty bastaldy deýge bolady. Myńdaǵan adam óz-ózin usynyp jatyr".