Qazir sharýashylyqqa kelgen shyǵyn eseptelip jatyr
Atyraýda jeke sharýashylyqqa tıesili myńnan astam "Edilbaı" tuqymdy qoı tirideı janyp ketti, dep habarlaıdy Almaty-akshamy.kz astanatv-ǵa silteme jasap.
Oqıǵa Qurmanǵazy aýdanynyń Súıindik aýyldyq okrýgine qarasty Jalǵyzapan aýyly mańynda bolǵan. Resmı derek boıynsha, 47 gektar jer otqa oranǵan. Aýyl turǵyndarynyń aıtýynsha, tilsiz jaý Reseı Federasıasy Astrahan oblysynyń aýmaǵynda tutanǵan. Keıin Atyraý oblysyna jaıylǵan. Seriktestik tiri qalǵan qoıdy soıyp alyp úlgeripti.
«Tiri qalǵan 199 bas qoı soıyp alyndy. 304 bas qoı Atyraý qalasyna avtokólikpen jetkizildi. Shyǵyn kólemi 500 bas qoı. Seriktestik tarapynan mal basy shyǵyny jóninde quzyrly organdarǵa aryz-shaǵym túsken joq», - deıdi Qurmanǵazy aýdany ákiminiń orynbasary Nurlybek Qalıev.
Jergilikti tótenshe jaǵdaılar bóliminiń málimetinshe, órtti sóndirýge 30 qutqarýshy men 4 tehnıka jumyldyrylǵan. Jalǵyzapan jáne Súıindik aýylynyń erikti turǵyndary jalyndy aýyzdyqtaýǵa atsalysqan.
Abyroı bolǵanda, adam aman. Qazir sharýashylyqqa kelgen shyǵyn eseptelip jatyr.